شىلىمقورلار تەمەكى سىرتىنا شىرىگەن دەنە مۇشەلەرىنىڭ سۋرەتىن سالۋعا قارسى شىقتى

استانا. قازاقپارات - شىلىمقۇمارلاردى قورقىتاتىن «قۇبىجىق سۋرەتتەر». ديزاينەرلەر قوراپقا سالىناتىن سونداي بەينەلەردى كورسەتتى.

ياعني، تەمەكى سىرتىندا ەندى بۇدان بىلاي ءولى تۋىلعان شارانا مەن شىرىگەن دەنە مۇشەلەرىنىڭ سۋرەتتەرى بادىرايىپ تۇرماق دەپ حابارلايدى «ك ت ك» ارناسى.

شىلىمقور تۇرماق، شەكپەيتىن كىسىنىڭ ءوزىن شوشىتىپ جىبەرەتىن جاڭالىق - وندىرۋشىلەردىڭ كوڭىلىنەن شىقپاي قالدى. ءتىپتى، قوس تاراپ تەمەكى ءۇشىن ايقايلاسىپ، شىلىمعا قارسى جاسالعان شەرۋدىڭ سوڭى قىپ-قىزىل جانجالعا ۇلاستى.

ءبىر توپ بەلسەندى وسىلاي كوك تۇتىنگە قارسى ۇرانداتتى. ءبىرى - جۇرەك، ءبىرى- وكپە بوپ كوستيۋم كيىپ العاندار تەمەكىنىڭ زيانى تۋرالى تاماعى جىرتىلعانشا ايقايلادى. ونىسىنا وزدەرى ءماز بولىپ، قالجىڭداسىپ تا الدى.

ءبىراق، ولاردى تىڭداعان جان بولمادى. شەرۋدى سىرتتاي باقىلاپ تۇرعاندار ءارى قاراي دا شىرەنىپ شىلىمىن شەگىپ تۇر. دەسە دە، شىلىمقورلاردى شوشىتانىن نارسە شەرۋدەن كەيىن بولدى. ديزاينەرلەر تەمەكى سىرتىنا سالىناتىن سونداي بەينەلەردىڭ ءبىرسىپىراسىن كورسەتتى.

«تەمەكى سىرتىنداعى قورقىنىشتى سۋرەتتەردى كورگەن ادام شىلىمدى تاستايدى دەپ سەنەمىز. دۇنيەجۇزىلىك دەنساۋلىق ساقتاۋ ۇيىمى دا وسىنى قولداپ وتىر. بۇل سۋرەتتەردەن سوڭ ءبارى بىردەي تەمەكىدەن باس تارتپاسا دا، بەسىكتەن ءالى بەلى شىقپاعان جاستار ويلانادى دەپ ۇمىتتەنىپ وتىرمىز»، - دەيدى «تەمەكى تۇتىنىنەن ازات قازاقستان» قوزعالىسىنىڭ جەتەكشىسى ءجاميلا سادىقوۆا.

«قۇبىجىق سۋرەتتەردىڭ» ىشىندە ولگەن سابيدەن باستاپ، شىرىگەن دەنە مۇشەلەرىنە دەيىن دە بار. قانتالاعان مي مەن قۇرتتاعان وكپەنىڭ دە سۋرەتى ەندى تەمەكىنىڭ بەتىنە تۇسپەك. كۇرەسكەرلەردىڭ پىكىرىنشە، وسىلاي جۇرتتى قورقىتۋ ارقىلى ولاردى جامان ادەتتەن ارىلتۋعا بولادى ەكەن. تەك ءوز ماركاسىندا ءمايىت بەينەسىنىڭ تۇرۋى بيزنەسمەندەردىڭ كوڭىلىنەن شىقپاي قالدى.

«تەمەكىگە قارسىلىق بىلدىرۋشىلەردىڭ وتكىزىپ جۇرگەن اكتسيالاردان تۇك پايدا جوق. ول سۋرەتتەردى كورىپ، ەشكىم دە تەمەكىنى تاستاپ كەتكەن جوق. قۇر بەكەر اقشا شاشۋدىڭ امالى بۇل»، - دەيدى «بيزنەس جەمقورلىققا قارسى» اليانسىنىڭ بەلسەندىسى كيريلل پاۆلوۆ.

تەمەكىنىڭ جاڭا ديزاينىنا قارسى شىققاندار تەمەكى وندىرۋشىلەرىن بىرەسە جاقتاپ، بىرەسە داتتاپ اقىرى قوراپ سىرتىنداعى سۋرەت ءۇشىن تاراپتار جانجالداسىپ تىندى.

قالاي دەگەنمەن دە، تەمەكى ءوندىرۋشى كومپانيالار كەلەسى جىلدىڭ 15-قاراشاسىنا دەيىن «قۇبىجىق سۋرەتتەردى» قوراپتارىنا جاپسىرۋى ءتيىس. بۇل قازاقستاندا جاسالعان جانە شەتەلدىك ماركالى برەندتتەردىڭ بارىنە مىندەتتى. ءبىراق، بۇل شارانىڭ دا قانشالىقتى ءتيىمدى بولارى بەلگىسىز. ويتكەنى، جۇرتتىڭ الدىندا «تەمەكىگە قارسىمىز» دەپ قىزىل كەڭىردەك بولعاندار جۋرناليستەر تاراپ كەتكەندە تەمەكىنى راقاتتانا تارتىپ ءجۇردى.