ەكسپو-قالاشىقتىڭ باستى نىسانىن سالۋ بارىسىندا ەرەكشە جۇمساق شىنى قولدانىلدى
بۇل تۋرالى بۇگىن «استانا ەكسپو-2017» ۇ ك» ا ق ساتىپ الۋلار جانە ايماقتارمەن جۇمىس دەپارتامەنتىنىڭ ديرەكتورى اننا بويەۆا ءمالىم ەتتى.
«ءبىز ونىڭ سىرتىن شىنىمەن قاپتاپ بولدىق دەسەك تە بولادى. ول شىنىلاردىڭ ءارقايسىسى 850 كەلى تارتادى. اينەكتىڭ ءوزى ەرەكشە، يىلگىش كەلەدى. بۇل تەحنولوگيا العاش رەت قازاقستاندا، ارنايى ەكسپو ءۇشىن قولدانىلۋدا»، - دەپ اتاپ ءوتتى ول.
سونىمەن قاتار نەگىزگى پاۆيلوندى سالۋ بارىسىندا بىرەگەي مەتالل ماتەريالدارى قولدانىلىپ وتىر.
«وسىنشا كولەمدە مەتالل قۇراستىرىلىمدار جەتكىزىپ بەرگەن قاراعاندى وبلىسىنا ۇلكەن العىس ايتامىز. ارينە، اتالعان سفەرانى سالۋ بارىسىندا الەمدە تەڭدەسى جوق تەحنولوگيالار قولدانىلدى. سفەرانىڭ ءوزى بەس قاباتتان تۇرادى، الايدا ءار قاباتى قالىپتى بەس قاباتتى عيماراتتىڭ بيىكتىگىمەن پارا-پار»، - دەيدى ا. بويەۆا.
ايتا كەتەيىك، ەكسپو-2017 كورمەسىنىڭ باستى نىسانى دومالاق سفەرا ىسپەتتەس عيمارات بولماق. وندا قازاقستان پاۆيلونى ورنالاسادى. ونىڭ جالپى اۋماعى 7855 شارشى مەتردى قۇرايدى دەپ كۇتىلۋدە.
اۆتور: جاسۇلان جولدىبايەۆ
