ينتەرنەت دۇكەننەن ساتىپ الىنعان جاستىق قۋىرشاقتىكى بولىپ شىقتى

استانا. قازاقپارات - 22 جاستاعى يازمين زۋرتتي eBay ينتەرنەت ساۋدا الاڭىنان جاتىن بولمەسىنە سايكەسەتىن ەكى جاستىق ساتىپ الادى.

الايدا ول جاستىقتاردىڭ قۋىرشاقتار ۇيىنە ارنالعانىن بايقاماعان، دەپ جازادى بريتاندىق Mirror.

كەيىن جاستىقتار جەتكىزىلگەندە كولەمىنىڭ كىشكەنتايلىعى سونشالىقتى الاقانعا سىيىپ كەتەتىنى بەلگىلى بولعان. ونى كورگەن قىز كۇلە بەرگەننەن باسقا امالى قالماعان.

توسەك جابدىعىن ساتىپ العان كەزدە باعاسى تومەندىگى مەن جەڭىلدىگىنە عانا ءمان بەرىلگەن. سوعان قىزىققان ول ونلاين دۇكەننەن ساۋدا جاساۋ ءۇشىن بىردەن نەسيە كارتاسى ارقىلى تولەم جاساعان.

كەيىن يازمين ءوزىنىڭ جاڭعالاقتىعى كەسىرىنەن ۇتىلىپ قالعانى جايىندا فەيسبۋكتەگى پاراقشاسىندا جازبا قالدىردى. جازبانى ءبىر كۇندە 103 مىڭداي ادام ۇناتتىم دەپ بەلگىلەسە، 30 مىڭ جەلى پايدالانۋشىسى پىكىر جازعان.