قىمىراننىڭ قادىرىنە قاشان جەتەمىز؟

استانا. قازاقپارات - قازاقتىڭ ۇلتتىق تاعامدارىن ءسوز ەتكەندە، ارينە، ۇلتتىق سۋسىنداردى تاسادا قالدىرۋعا بولمايدى.

ناق وسى ۇلتىمىزدىڭ سۋسىندارىنا قاتىستى وتاندىق عالىمدار ءبىر عانا قىمىراننىڭ جۇزگە تارتا قاسيەتىن دالەلدەپ وتىر، دەپ جازادى «الماتى اقشامى» گازەتى.

جالپى جىلقى، سيىر مالىنداي ەمەس، تۇيەنىڭ جەيتىن ءشوبى باسقا. سوندىقتان، ونىڭ ءسۇتى دە ەرەكشە بولىپ كەلەدى. تۇيە جيدە، جىڭعىلدىڭ گۇلدەرىن، قاراتالدىڭ باسىن، تىكەن، جانتاق شوپتەرىن ازىق ەتەدى. شۇباتتى ىشكەن ادامنىڭ قارنى دا اشپايدى. ول - ءارى سۋسىن، ءارى تاماق. قىمىراننىڭ ماڭىزدىلىعى، مايلىلىعى جوعارى. ءىش قۇرىلىستارى اۋىراتىن ادامدارعا بۇل - مىڭ دا ءبىر ەم. اسىرەسە، اسقازان جاراسىنا شيپالى. شۇباتتىڭ ارقاسىندا وسىنداي دەرتپەن اۋىرعان تالاي ادام جازىلىپ كەتتى. سونداي-اق، شۇبات ادامنىڭ يممۋنيتەتىن كوتەرەدى.

جاقىندا عانا عالىم-پروفەسسور ءمۇساتىللا توقانوۆ ديابەتتەن قۇتقارۋدىڭ عىلىمي نەگىزىن جاسادى. سۋسامىر دەرتىنە شيپا تاپپاي الەمدىك مەديتسينا داعدارىپ جاتقاندا شىمكەنتتىك عالىم ءمۇساتىللا توقانوۆ داۋاسىن تۇيە سۇتىنەن تاپتى. قازىر دۇنيەنى وبىر اۋرۋى تەڭسەلتىپ تۇر. الەمدىك مەديتسينا دارمەنسىز. ءبىراق، ەمىن جاپپاي ىزدەپ جاتىر. ماسكەۋدىڭ گەرتسەن اتىنداعى ونكولوگيالىق ينستيتۋتىنىڭ پروفەسسورى ر. ي. ياكۋبوۆسكايا باستاعان ءبىر توپ عالىمدار وبىر اۋرۋىنىڭ الدىن الاتىن لاپروت دەگەن پرەپاراتتى وندىرىسكە ەنگىزبەكشى. پروفەسسور راكقا قارسى لاكتوفەررين دەگەن فەرمەنتتى انا ءسۇتىنىڭ اقۋىزىنان تاپقان. ءبىراق، عىلىمي جاڭالىقتىڭ وزىندىك قيىندىقتارى از ەمەس. عالىمنىڭ دالەلدەۋىنشە، تۇيە سۇتىنەن دە لاكتوفەررين الۋعا بولادى. سونىمەن قاتار، تۇيە ءسۇتى سيىر سۇتىمەن سالىستىرعاندا «С»  دارۋمەنى 5 ەسە،  «تەمىر» 10 ەسە، «كالتسي» 1,5 ەسە، «لاكتوفەررين» 30 ەسە كوپ. باسقا قاسيەتتەرىن ساناماعاندا قۇرت اۋرۋىنا، ىشەك-قۇرىلىستارى، باۋىر، دارۋمەن جەتىسپەۋشىلىك، قان ازدىق جانە قانت اۋرۋىنا بىردەن-ءبىر ەمىڭىز تۇيە سۇتىندە.

نەگىزىندە، دەنساۋلىققا اسا پايدالى بۇل سۋسىننىڭ قادىرىن بىزدەن بۇرىن شەت ەل ءبىلىپ وتىر. قازىردە يزرايل، گەرمانيا، نورۆەگيا ءتارىزدى ەلدەردە قىمىراننىڭ قۇنى دا جوعارى، ءوندىرىلۋ تەحنولوگياسى دا ساپالى. مالايزيا، يزرايل، گەرمانيا ەلدەرىندە قىمىراننىڭ قۇرىلىسىن، قاسيەتىن، قۇرامىن زەرتتەۋگە سول ەلدىڭ عالىمدارى بارىنشا ىقىلاس بىلدىرۋدە. عالىمداردىڭ ايتۋىنشا، ساپاسى جوعارى قىمىراننىڭ ادام اعزاسىنداعى ءوت جولدارىن تازالاۋعا، باۋىر-بۇيرەك جۇمىسىن جاقسارتۋعا بەرەر شيپاسى مول ەكەنىن انىقتادى.

وعان دالەل، ءبىر ليتر قىمىران ەرەسەك ادامنىڭ В1, В12 جانە С دارۋمەندەرىنە دەگەن قاجەتتىلىگىن بەرە الادى ەكەن. قىمىران قىشقىل ءبولۋدى تەزدەتىپ، استى جىلدام قورىتۋعا سەپتىگىن تيگىزەدى. وسى ارقىلى باۋىردى تازالاپ، ءوت جولدارىنىڭ جۇمىسىن جاقسارتادى. ايران مەن سۇتكە قاراعاندا قىمىراننىڭ تيىمدىلىگى اناعۇرلىم جوعارى.

قىمىراننىڭ ادام اعزاسىنا تيگىزەر شيپاسى وراسان. بىرىنشىدەن، ادامنىڭ اسقازانى مەن ىشەگىنە كومەگى كوپ. ەكىنشىدەن، جۇيكە جۇيەسىن قالپىنا كەلتىرەدى. ادام اعزاسىن ورنىنا كەلتىرۋگە پايداسى زور. سوندىقتان كۇندەلىكتى تاعام راتسيونىنا تۇيەنىڭ سۇتىنەن جاسالعان قىمىراندى قوساتىن بولساڭىز، ءىشىپ-جەگەنىڭىز جاقسى قورىتىلىپ، قۋاتىڭىز ارتا تۇسەدى.