بۇل كۇنى قازاقتىڭ ايگىلى گەنەرالى ساعادات نۇرماعانبەتوۆ دۇنيەگە كەلگەن
اقمولا وبلىسىنىڭ اقكول اۋدانىندا تۋعان. 1943-جىلى كۋشكا قالاسىنداعى تۇركىستان پۋلەمەت ۋچيليشەسىن بىتىرگەننەن كەيىن مايدانعا جىبەرىلدى. سولتۇستىك كاۆكاز، 4-ۋكراين جانە 1- بەلارۋس مايداندارىندا ۆزۆود، روتا جانە باتالون كومانديرى بولىپ، پولشا جەرىندە پيليتسا وزەنىنىڭ سول جاعالاۋىنداعى پلاتسدارم ءۇشىن بولعان ۇرىستا ەرەكشە ەرلىك كورسەتتى. 1949-جىلى ماسكەۋدەگى اسكەري اكادەميانى ءبىتىرىپ، تۇركىستان اسكەري وكرۋگى شتابىندا ىستەدى.
1954-1958-جىلدارى - موتواتقىشتار پولكىنىڭ كومانديرى. 1958-1961-جىلدارى - موتواتقىشتار ديۆيزياسىنىڭ شتاب باستىعى. 1962-1969-جىلدارى قازاق ك س ر ازاماتتىق قورعانىس شتابىنىڭ باستىعى. 1969-1989-جىلدارى - ورتا ازيا اسكەري وكرۋگى قولباسشىسىنىڭ ورىنباسارى، وڭتۇستىك اسكەري توبى قولباسشىسىنىڭ ءبىرىنشى ورىنباسارى. 1991-1992-جىلدارى - قازاقستان رەسپۋبليكاسى مەملەكەتتىك قورعانىس كوميتەتىنىڭ ءتوراعاسى. 1992-1995-جىلدارى - قازاقستاننىڭ تۇڭعىش قورعانىس ءمينيسترى. 1995-1996-جىلدارى قازاقستان رەسپۋبليكاسى پرەزيدەنتىنىڭ كەڭەسشىسى قىزمەتىن اتقاردى.
س. نۇرماعانبەتوۆ قازاقستاننىڭ تاۋەلسىزدىك العان العاشقى جىلدارىندا اۋماقتىق تۇتاستىقتى قامتاماسىز ەتۋدە، رەسپۋبليكانىڭ قارۋلى كۇشتەرىن قۇرۋدا، ۇلتتىق كادرلاردى دايارلاۋدا ۇلكەن ەڭبەك ءسىڭىردى. 1999-جىلى ناۋرىزدا استانا قالاسىندا گەنەرال ساعادات نۇرماعانبەتوۆ اتىنداعى «جاس ۇلان» رەسپۋبليكالىق مەكتەبى قۇرىلدى. تاۋەلسىز ەلىمىزدىڭ قارۋلى كۇشتەرىندە قىزمەت ەتەتىن بولاشاق ساربازدار وسى مەكتەپ قابىرعاسىنان تاربيەلەنىپ شىعادى.
«لەنين»، 2 مارتە « قىزىل جۇلدىز»، 1,2- دارەجەلى «وتان سوعىسى»، «قۇرمەت بەلگىسى»، «قازان توڭكەرىسى»، 2 مارتە «ەڭبەك قىزىل تۋ»، «وتان» وردەندەرىمەن، مەدالدارمەن، شەت ەل وردەن-مەدالدارىمەن ماراپاتتالعان.
