دەنساۋلىق: كۇنىنە قانشا جول ءجۇرۋ كەرەك؟

نۇر- سۇلتان. قازاقپارات - جاياۋ جۇرگەن دەنساۋلىققا اسا پايدالى، دەپ جازادى ماسساگەت پورتالىنىڭ دەنساۋلىق ايدارىندا.

اسىرەسە جۇرەك بۇلشىق ەتتەرىنىڭ قالىپتى جۇمىس جاساۋىنا جاعداي جاسايدى.

ادام كۇنىنە كەم دەگەندە 3 شاقىرىم جاياۋ ءجۇرۋى كەرەك. كۇندەلىكتى كۇيبەڭ تىرشىلىكپەن قانشا شاقىرىم جول ءجۇرىپ، قانشا قيمىل-قوزعالىس جاساعانىمىزدى قاپەرگە الا بەرمەيمىز. دەسە دە تەحنولوگيا دامىعان زاماندا قيمىل-قوزعالىسىمىز ازايىپ بارا جاتقانىن مويىنداۋعا ءتيىسپىز.

كەڭسەدە قىزمەت ىستەيتىندەر 3 شاقىرىم جول جۇرمەك تۇگىلى، ءبىر-بىرىمەن كوپ سويلەسە دە بەرمەيدى. مۇنىڭ دەنساۋلىققا تيگىزەر زيانى كوپ. ەندەشە اۋرۋدىڭ الدىن الۋعا كىرىسكەن دۇرىس.

ەگەر كولىگىڭىز بولسا، اپتاسىنا بىرنەشە كۇن جۇمىسقا قوعامدىق كولىكپەن نە جاياۋ بارىڭىز. جاياۋ ءجۇرۋ سالماعىڭىزدى ءبىرقالىپتى ۇستاۋعا دا كومەكتەسەدى. ول ءۇشىن جۇمىسىڭىزعا بارار جولدا جانە قايتار جولدا ءبىر ايالداما بۇرىن ءتۇسىپ قالىپ، جاياۋ ءجۇرىڭىز.

كوپ قاباتتى ۇيدە تۇرساڭىز، ليفت كومەگىنە كوپ جۇگىنبەگەن ءجون. سەبەبى، باسپالداقپەن ءتۇسىپ-كوتەرىلۋدىڭ ءوزى - جاتتىعۋ. جۇمىستا دا ورىندىقتا ۇزاق وتىرا بەرمەي، ءجيى قيمىلداڭىز.

تىم قۇرىعاندا كۇنىنە 15-20 مينۋتىڭىزدى سەرۋەندەۋگە ارناڭىز. سەبەبى، جاياۋ ءجۇرۋ - ەستە ساقتاۋ قابىلەتىڭىزدى جاقسارتىپ، قان اينالىمىڭىزدى رەتتەيدى. كۇنىنە 1 شاقىرىم جاياۋ ءجۇرۋ - 10 مينۋت جۇزۋگە، 16 مينۋت اەروبيكامەن اينالىسۋعا، 12 مينۋت فۋتبول ويناۋعا جۇمساعان ءجون.

سپورتتىڭ كەيبىر ءتۇرى ادام دەنساۋلىعىنا كەرى اسەرىن تيگىزۋى مۇمكىن. الايدا، جاياۋ ءجۇرۋدىڭ ەشقانداي دا زيانى جوق. قيمىل-قوزعالىس قاشان دا ماڭىزدى.