جەر كوميسسياسىنىڭ كەلەسى وتىرىسىندا شەتەلدىككە جەردى جالعا بەرۋ، بەرمەۋ ماسەلەسى تالقىلانادى - باقىتجان ساعىنتايەۆ

 استانا. قازاقپارات - جەر رەفورماسى جونىندەگى رەسپۋبليكالىق كوميسسيانىڭ كەلەسى وتىرىسىندا شەتەلدىكتەرگە جەردى جالعا بەرۋ، بەرمەۋ ماسەلەسى تالقىلانادى. بۇگىن استاناداعى ۇلتتىق مۋزەيدە وتكەن جەر رەفورماسى بويىنشا رەسپۋبليكالىق كوميسسيانىڭ وتىرىسىندا جيىندى قورىتىندىلاعان كوميسسيا ءتوراعاسى باقىتجان ساعىنتايەۆ وسىلاي ءمالىم ەتتى.

پرەمەر- مينيستر ورىنباسارىنىڭ ايتۋىنشا، بۇگىنگى وتىرىستا ايتىلعان پىكىرلەر مەن ۇسىنىستاردىڭ بارلىعى سارالانىپ، جۇمىس توپتارىندا تالقىلانادى.

«كەلەسى وتىرىستا ءبىز جەردى شەتەلدىكتەرگە جالعا بەرەمىز بە، بەرمەيمىز بە، سونى بۇگىنگى وتىرىستاعى سەكىلدى تالقىلايتىن بولامىز. سودان كەيىن، وسى ۇلكەن ەكى تاقىرىپ ايتىلىپ، تالقىلانىپ بىتكەننەن سوڭ حالىققا شىعاتىن شىعارمىز، ول ءۇشىن دە ءوزىمىزدىڭ پوزيتسيامىز، ۇسىنىسىمىز بولۋ كەرەك. ونداي ۇسىنىس بولماسا جاي حالىققا بارۋ قيسىنسىز، ولار دا ءبىزدىڭ ۇسىنىسىمىزدى كۇتىپ وتىر»، - دەدى ب. ساعىنتايەۆ.

جيىندى قورىتىندىلاعاندا كوميسسيا جەتەكشىسى ەندىگى وتىرىس كەلەسى سەنبىگە جوسپارلانعانىن جەتكىزدى.

اۆتور: قانات مامەتقازى ۇلى