اتىراۋدا توتەنشە جاعداي جاريالاندى
بالالار 4 مەكتەپ پەن 2 بالاباقشانىڭ اۋلاسىنا كىرە الماي قالدى. ال جەكە سەكتورداعى 8 ءۇيدىڭ قابىرعالارى تۇگەل قۇلاعان. وسىعان بايلانىستى بۇگىن اتىراۋ قالاسىندا توتەنشە جاعداي جاريالاندى، دەپ حابارلايدى 24.kz.
باسپاناسىز قالعان 27 ادام مەكتەپتەر مەن جالدامالى پاتەرلەرگە كوشىرىلىپ، ەكى مەزگىل ىستىق تاماقپەن قامتاماسىز ەتىلدى. ەرىكتى جاساقتار قۇرىلىپ، زارداپ شەككەندەرگە كومەك قولىن سوزىپ جاتقاندار دا تابىلىپ جاتىر. بۇعان دەيىن قۇرمانعازى اۋدانىنداعى قيعاش وزەنى ارناسىنان اسىپ، جاعالاۋداعى ەلدى مەكەندەرگە قاۋىپ توندىرگەن ەدى. تولاسسىز جاۋعان جاۋىن يساتاي مەن ماقات اۋداندارىنىڭ تۇرعىندارىن دا ءبىرشاما ابىگەرگە سالىپ قويدى. ءقازىر قۇتقارۋ قىزمەتىنىڭ وكىلدەرى جاعدايدى باقىلاۋدا ۇستاپ وتىر. قاۋىپتى ايماقتاردىڭ بارلىعىنا كۇزەت قويىلعان.
«بۇگىنگى كۇندە قۇرمانعازى اۋدانىندا سۋ باسۋ قاۋپى جوق. قورقىنىش سەيىلدى. يساتاي جانە ماقات اۋداندارىندا جاعداي ءبىرقالىپتى. ءتيىستى جۇمىستار جاسالۋدا. قازىرگى ۋاقىتتا اتىراۋ قالاسىنداعى زارداپ شەككەن نىسانداردىڭ مولشەردەن كوپتەۋ بولۋىنا بايلانىستى اتىراۋ قالاسى اكىمىنىڭ شەشىمىمەن توتەنشە جاعداي جاريالاندى. ءتيىستى شارالار اتقارىلۋدا»، - دەيدى وبلىستىق ت ج د توتەنشە جاعدايلاردىڭ الدىن الۋ ءبولىمىنىڭ باسشىسى الىبەك جانعاليەۆ.
