قازاقستان سەنەگالمەن بارلىق باعىتتا ىنتىماقتاستىققا ءازىر - ن. نازاربايەۆ
بۇل تۋرالى اقوردانىڭ باسپا ءسوز قىزمەتىنەن حابارلادى.
مەملەكەتتەر باسشىلارى كەزدەسۋ بارىسىندا ساياسي، ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن، سونداي-اق ءوزارا مۇددەلىلىك تۋعىزىپ وتىرعان حالىقارالىق جانە وڭىرلىك سيپاتتاعى جايتتاردى تالقىلادى.
قازاقستان پرەزيدەنتى افريكا قۇرلىعىنىڭ باتىس ايماعىنان كەلگەن كوشباسشىنىڭ ەلىمىزگە العاشقى ساپارى ءۇشىن ريزاشىلىق ءبىلدىردى.
«مەملەكەتتەرىمىز اراسىندا ءوزارا تولىق تۇسىنىستىك بار. قازاقستان مۇسىلمان ۇمبەتىنىڭ ءبىر بولشەگى بولىپ سانالاتىندىقتان، قازىرگىدەي كۇردەلى ۋاقىتتا تالقىلاپ، پىكىر الماساتىن ماسەلەلەر جوق ەمەس. جالپى، ءبىزدىڭ ەل سەنەگالمەن بارلىق باعىتتا - ساياساتتا دا، ەكونوميكادا دا ىنتىماقتاستىققا ءازىر. ءسىزدىڭ رەسپۋبليكاڭىز افريكاداعى ماڭىزدى مەملەكەت جانە ونىمەن ىنتىماقتاسۋ ءبىز ءۇشىن زور مارتەبە»، - دەدى مەملەكەت باسشىسى.
م. سالل قازاقستانعا كەلۋگە شاقىرعانى ءۇشىن العىس ايتىپ، بۇل ساپار ەكى ەلدىڭ اراسىنداعى بايلانىستاردى جولعا قويۋعا مۇمكىندىك بەرەدى دەپ ۇمىتتەنەتىنىن جەتكىزدى.
«ءسىزدىڭ ورتالىق ازياداعى جانە ودان سىرتقى الەمدەگى كوشباسشىلىعىڭىزعا ءتانتىمىن. ءسىزدىڭ ديپلوماتيالىق، ساياسي جانە ەكونوميكالىق قىزمەتىڭىز وسى وڭىردەن تىسقارى جەرلەردى دە قامتىپ وتىر. استانا ءسىزدىڭ بۇكىل الەمدە قۇرمەتكە يە بولعان اسقان جاسامپازدىق قاسيەتتەرىڭىزدىڭ كورىنىسى بولىپ سانالادى. مەن ءوز اتىمنان بۇكىل افريكانىڭ قازاقستانمەن ىنتىماقتاستىقتى قالايتىنىن ايتقىم كەلەدى. قازىر ءبىزدىڭ قۇرلىققا بۇكىل الەم قىزىعۋشىلىق تانىتۋدا. ءبىز سىزدەرگە سەرىكتەس رەتىندە ىنتىماقتاستىقتى جولعا قويۋ ءۇشىن كەلدىك»، - دەدى سەنەگال پرەزيدەنتى.
