الوە شىرىنىنان ءۇي جاعدايىندا جاساۋعا بولاتىن ەمدىك قوسپالار

استانا. قازاقپارات - الوە - ادامدار دارىلىك ماقساتتا قولدانا باستاعان العاشقى وسىمدىك. قازىرگى زاماننىڭ دامىعانىنا قاراماستان، ونىڭ تانىمالدىلىعى وتە جوعارى بولىپ وتىر.

اسىرەسە، مەديتسينا جانە كوسمەتولوگيا سالاسىندا الوە شىرىنى جوعارى سۇرانىسقا يە، دەپ جازادى anabol.kz.

الوە - سۋككۋلەنتتى (ىلعالدىلىقتى ساقتاي الاتىن ارنايى ۇلپاسى بار) وسىمدىكتەر توبىنا جاتاتىن گۇل. شىققان جەرى وڭتۇستىك افريكا ايماعى بولىپ سانالادى. نەگىزىنەن، قۇرعاق ءارى قۇمدى شولدەردە وسەدى. الوە ءسوزى اراب تىلىنەن شىققان. ماعىناسى «اشى» دەگەن ءسوزدى بىلدىرەدى. سونداي- اق، ەمدىك قاسيەتىنە بايلانىستى «ءۇي گۇلدەرىنىڭ كورولى» دەگەن دە بالاما اتقا يە.

الوە شىرىنىنىڭ پايداسى

الوە شىرىنىنىڭ قۇرامىندا بيولوگيالىق بەلسەندى قوسپالاردىڭ، ميكروەلەمەنتتەردىڭ جانە ءارتۇرلى دارۋمەندەردىڭ كوپ بولۋىنا بايلانىستى بۇل شىرىننىڭ ادام اعزاسىنا پايداسى مول.

 ول اس قورىتۋ بەزدەرىنىڭ سەكرەتسياسىن جاقسارتادى.

گاستريت، سوزىلمالى كوليت، ەنتەروكوليت، گاستروەنتەريت، جانە اس قورىتۋ جۇيەسىنە بايلانىستى باسقا دا كوپتەگەن اۋرۋلاردى ەمدەيدى.

ول اعزانىڭ قورعانىسىن قالپىنا كەلتىرىپ، جالپى ءال- اۋقاتىن جاقسارتادى.

اس قورىتۋدى قالىپقا كەلتىرىپ، قىشقىل رەفليۋكس سيمپتومدارىن جويۋعا كومەكتەسەدى.

الوە شىرىنىمەن ەمدەلۋ

1) كوپتەگەن تەرى اۋرۋلارى كەزىندە، جازىلۋى قيىن جارالارعا، ويىق جارالاردى ەمدەۋدە الوە شىرىنى قولدانىلادى. ول ءۇشىن: الوە شىرىنىمەن بالدى تەڭ مولشەردە الىپ، وعان 1 اس قاسىق سپيرت قوسىپ ارالاستىرامىز. ءدارى دايار. بۇل قوسپانى ستەريلدى تاڭعىشتار استىندا كۇنىنە ەكى رەت جارالانعان جەرگە جاعۋ كەرەك. ونى توڭازىتقىشتا ساقتاۋ قاجەت. الوە شىرىنى دەرماتيت، كۇيىكتەر، تروفيكالىق ويىقتار، ەكزەماعا قارسى اسەر ەتەدى. ونى كۇنىنە ەكى رەت قولدانعان ءجون.

 2) الوە شىرىنىمەن برونح دەمىكپەسى جانە ديزەنتەريانى ەمدەۋگە بولادى. وسى كەلەڭسىزدىكتەردەن قۇتىلۋ ءۇشىن: جارتى شاي قاسىق بال جانە تەڭ مولشەردە سۇتپەن الوە شىرىنىن قوسىپ، تاماقتانۋدان جارتى ساعات بۇرىن ءىشۋ كەرەك. بۇل ءدارىنى كۇنىنە 3 رەت، جانە 3 اپتا قابىلداۋ قاجەت. سودان سوڭ، 14 كۇن دەمالىپ ەمدى قايتا باستاۋ قاجەت.

3) يممۋندىق جۇيەنى نىعايتۋ ءۇشىن جاڭا سىعىلعان 150 گرام الوە شىرىنىنا، 300 گرام قىزىل شاراپ جانە 1 ستاقان بال قوسىپ ارالاستىرامىز. قوسپانى 1 اپتا توڭازىتقىشتا ساقتاپ، سودان سوڭ، تاماقتانار الدىندا كۇنىنە ءۇش رەت ءبىر اس قاسىقتان قولدانىڭىز.

4) شاشتىڭ تۇسۋىنەن ساقتانۋ ءۇشىن، الوە شىرىنىمەن بالدى ارالاستىرىپ، وعان تۋرالعان سارىمساق قوسامىز. بارلىعىن ارالاستىرامىز. ءدارى دايار. وسى قوسپانى زاقىمدانعان جەرگە جاعىپ، 15 مينۋت ۇستايدى.