تۇركى الەمىنىڭ زيالىلارى تۇركىستاندا باس قوستى - فوتو
تۇركى الەمىنىڭ ءتۇپ قازىعى تۇركىستان شاھارىندا وتكەن بۇل جيىننىڭ تۇركى الەمى ءۇشىن ماڭىزى زور. سالتاناتتى جيىن، تۇركياداعى «تۇركى الەمىنىڭ جازۋشىلارى جانە كوركەمونەرپازدارى قورىنىڭ» كەزەكتى «XX حالىقارالىق تۇركى الەمىنە ەڭبەگى سىڭگەن تۇلعالاردى ماراپاتتاۋ» راسىمىمەن باستالدى. ول «تۇركى تىلدەس رەسپۋبليكالاردىڭ تاۋەلسىزدىگىنە 25 جىل» اتتى عىلىمي جيىنعا ۇلاستى.
عىلىمي باسقوسۋدى حالىقارالىق تۇركى اكادەمياسىنىڭ پرەزيدەنتى دارحان قىدىرالى جۇرگىزدى. جيىنعا كەلگەن تۇركى الەمىنىڭ زيالىلارى، ق ر تاۋەلسىزدىگىنىڭ 25 جىلدىعى، يۋنەسكو بويىنشا اتالعان «احمەت ياساۋي جىلى»، ۋنيۆەرسيتەت قۇرىلۋىنىڭ 25 جىلدىعى مەرەيتويلارىمەن قۇتتىقتادى. ءارى بۇگىنگى 19 -مامىر، تۇركيا مەملەكەتىنىڭ «اتاتۇرىكتى ەسكە الۋ جانە جاستار مەن سپورت كۇنى» مەرەكەسىمەن قۇتتىقتاپ، ىزگى تىلەكتەرىن ءبىلدىردى. زيالى تۇلعالار تۇركى حالىقتارىنىڭ تاريحىنا توقتالىپ، ورتاق ماقسات- مۇراتتار، الداعى اتقارىلار يگىلىكتى ىستەر جايىندا ءسوز قوزعادى.
بۇعان دەيىن الەمنىڭ لەفكوشا (كيپر)، باكۋ (ازەربايجان)، ۋسكۋف (ماكەدونيا)، نيۋ-يورك (ا ق ش)، بىشكەك (قىرعىزستان) سياقتى قالالارىندا شىمىلدىعى تۇرىلگەن «حالىقارالىق تۇركى الەمىنە ەڭبەگى سىڭگەن تۇلعالاردى ماراپاتتاۋ ءراسىمىنىڭ» كەزەكتى جيىرماسىنشى ءراسىمىنىڭ تۇركىستاندا ءوتۋى كەزدەيسوقتىق ەمەس.
بيىلعى ايتۋلى شارانىڭ ماراپات يەلەرى قاتارىندا ازەربايجان مەملەكەتىنىڭ ساياساتكەرى، جۋرناليست گ. پاشايەۆا، قىرعىستان مەملەكەتىنىڭ تۇركياداعى بۇرىنعى توتەنشە جانە وكىلەتتى ەلشىسى ب. قالامبەكوۆا، ماكەدونيالىق ت. يبرايمي، احمەت ياساۋي ۋنيۆەرسيتەتى وكىلەتتى كەڭەسىنىڭ ءتوراعاسى، پروفەسسور مۇسا يىلدىز، الەم جانە تۇركى حالىقتارىنىڭ اقىنى، جازۋشى و. سۇلەيمەنوۆ جانە جازۋشى، حالىقارالىق الاش سىيلىعىنىڭ لاۋرەاتى م. بايعۇت بار. سونىمەن قاتار تۇركيانىڭ «گازيانتەپ» ۋنيۆەرسيتەتىنىڭ رەكتورى، پروفەسسور م. يا. جوشكۋن، تۇركى الەمى بىلىمىنە ەڭبەك سىڭىرگەن ق. بۇلبۇل، ت ر ت-1 تەلەارناسىنىڭ جۋرناليسى م. بوزداع، پروفەسسور ح. كوشان، ءتىل مامانى، جازۋشى ي. گەديكلي، قىلقالام شەبەرى، پروفەسسور ا. كاراوعلۋ، «انادولى اۋىل قورعاۋشىلارى جانە شەيىت وتباسىلارى كونفەدەراتسياسىنىڭ» باسشىسى ز. سوزەن، تۇركى الەمى جازۋشىلار جانە كوركەمونەرپازدار قورىنىڭ ءتوراعاسى ي. اكەنگين، جۋرناليست، جازۋشى، اقىن م. ۋ. يىلماز، سامسۋن قالاسى اكىمشىلىگىنىڭ مادەنيەت جانە الەۋمەتتىك دەپارتامەنتىنىڭ باسشىسى ن. چاماش قوردىڭ ارنايى ەستەلىك كادەسىيىمەن ماراپاتتالدى. مۇنىمەن قاتار تۇركى الەمى زيالىلارىنا ۋنيۆەرسيتەتتىڭ «ياساۋي جىلى» مەدالى دە تابىستالدى.
سونداي-اق، ۋنيۆەرسيتەتتىڭ 60 تان اسا ارداگەر وقىتۋشى-پروفەسسورلارى مەن قىزمەتكەرلەرىنە مەرەيتويلىق «25 جىل» جانە «ياساۋي جىلى» مەدالى سالتاناتتى تۇردە تاپسىرىلدى، دەپ حابارلايدى ۋنيۆەرسيتەتتىڭ باسپا ءسوز قىزمەتى.
