13:39, 19 - مامىر 2016 | GMT +5
حالىقارالىق ۆاليۋتا قورىنىڭ باسشىسى كريستين لاگارد قازاقستانعا كەلەدى
استانا. قازاقپارات - حالىقارالىق ۆاليۋتا قورىنىڭ باسقارۋشى ديرەكتورى كريستين لاگارد استانا ەكونوميكالىق فورۋمىنىڭ (ا ە ف) شەڭبەرىندە ح ۆ ق- نىڭ وڭىرلىك كونفەرەنتسياسىنا قاتىسۋ ءۇشىن كەلەسى اپتادا قازاقستانعا كەلەدى.
بۇل تۋرالى بۇگىن جۋرناليستەرگە ق ر ۇلتتىق بانكى ءتوراعاسىنىڭ ورىنباسارى عالىمجان ءپىرماتوۆ حابارلادى.
«ا ە ف- كە ورايلاستىرىلعان ح ۆ ق- نىڭ وڭىرلىك كونفەرەنتسياسى 24- مامىردا استانا قالاسىندا جابىق دوڭگەلەك ۇستەل فورماتىندا وتەدى.
كونفەرەنتسياعا قاتىسۋشىلار رەتىندە ورتالىق ازيا، كاۆكاز، ەۋرازيا ءوڭىرىنىڭ ەلدەرى ەكونوميكالىق بلوگىنىڭ ءبىرىنشى باسشىلارى ءسوز سويلەيدى» - دەدى ع. ءپىرماتوۆ.
ونىڭ ايتۋىنشا، كونفەرەنسيا بارىسىندا ءوڭىردىڭ اعىمداعى ەكونوميكالىق جاعدايىن جانە ورتامەرزىمدى پەرسپەكتيۆادا ورنىقتى وسۋگە جاردەمدەسۋدى تالقىلاۋ جوسپارلانعان.
ەسكە سالا كەتسەك، ەكونوميكالىق تۇراقتىلىقتى قامتاماسىز ەتۋگە جاردەمدەسۋ جانە قورعا مۇشە ەلدەرگە پراكتيكالىق كومەك كورسەتۋ - ح ۆ ق- نىڭ نەگىزگى ماقساتى.
