قازاقستاننىڭ اسكەري ۇشقىشتارىنا ءبىرىنشى جانە ەكىنشى سىنىپتى بىلىكتىلىك بەرىلدى - فوتو

استانا. قازاقپارات - ق ر ق ك اۋە قورعانىسى كۇشتەرىنىڭ باس قولباسشىسى اۆياتسيا گەنەرال-لەيتەنانتى نۇرلان ورمانبەتوۆ ق ر قورعانىس ءمينيسترى بۇيرىعىنىڭ تالاپتارىن ورىنداۋ ءۇشىن اۋە قورعانىسى كۇشتەرىنىڭ ۇشقىشتارىنا سىنىپتىق بىلىكتىلىك بەردى، دەپ حابارلادى ۆەدومستۆونىڭ باسپا ءسوز قىزمەتى.

«قازاقستان رەسپۋبليكاسىنىڭ قارۋلى كۇشتەرى، اۋە قورعانىسى كۇشتەرىنىڭ اسكەري قىزمەتشىلەرى جاۋىنگەرلىك وقۋ مەن قىزمەتتە وزدەرىنىڭ جەتىستىكتەرىمەن ەلىمىزدىڭ قورعانىس قابىلەتتىلىگىن نىعايتۋ ىسىنە قوماقتى ۇلەس قوسىپ، مەملەكەتىمىزدىڭ ەگەمەندىگى مەن اۋماقتىق بۇتىندىگىن مىزعىماستاي ەتىپ قورعاۋدا»، - دەدى ق ر ق ك ا ق ك باس قولباسشىسى اۆياتسيا گەنەرال-لەيتەنانتى نۇرلان ورمانبەتوۆ.

اسكەري ۇشقىشتاردىڭ سىنىپتىق بىلىكتىلىگى - بىلىمدەرى مەن پراكتيكالىق ماشىقتارىنىڭ دەڭگەيىنە سايكەس ۇشۋ قۇرامى دايارلىعىنىڭ كاسىبي دەڭگەيىن، بەرىلگەن ۋاقىتتا فۋنكتسيونالدىق مىندەتتەرىنىڭ بەلگىلى ءبىر كولەمىن شەبەر جانە جوعارى ساپادا ورىنداۋمەن سيپاتتالاتىن ايرىقشا كورسەتكىش ەكەنىن ايتا كەتەيىك.

«ءبىرىنشى سىنىپتى اسكەري ۇشقىش» بىلىكتىلىگى 50185 اسكەري ءبولىمىنىڭ كومانديرى پولكوۆنيك ەرمەك ساپاروۆ پەن شتاب باستىعى پودپولكوۆنيك رەنات دارمەنوۆكە بەرىلدى. «ەكىنشى سىنىپتى اسكەري ۇشقىش» بىلىكتىلىگىن مايور نۇربول ساپاربايەۆ پەن يۆان گاۆريلكوعا بەردى. ۇشقىشقا سىنىپتىق بىلىكتىلىگىن ارتتىرۋ ءۇشىن كۇندىز جانە تۇندە كۇردەلى مەتەورولوگيالىق جاعدايلاردا بەلگىلى ءبىر ساعات سانىن ۇشىپ ءوتۋى، جاۋىنگەرلىك قولدانۋعا مىندەتتى ساندى ورىنداۋى قاجەت. «1-سىنىپتى ۇشقىش» دەڭگەيىنە قول جەتكىزۋ ءۇشىن جىلدار بويى ۇدايى ۇشۋ قاجەت. وقۋ-جاتتىقتىرۋ ۇشۋلارىنان باسقا، بازالىق اۋەايلاقتاردا، ا ا ك- ءنىڭ بولىمدەرىندە جيىن دايارلىعى وتكىزىلەدى. وندا ءارتۇرلى بولىمدەردەن جينالعان ۇشقىشتار اۆيابازالاردىڭ بىرىنە كەلىپ، تاجىريبەلى نۇسقاۋشى ۇشقىشتاردىڭ جەتەكشىلىك ەتۋىمەن ۇشۋدىڭ اناعۇرلىم كۇردەلى تۇرلەرىنە دايىندالادى. سونىمەن، جىل سايىن كۇردەلى مەتەورولوگيالىق جاعدايلاردا ۇشۋلارعا ەكى نەمەسە ءۇش اپتالىق جيىندار وتكىزىلەدى. اتالمىش جيىندار ادەتتە، كۇزگى-قىسقى جانە كوكتەمگى-قىسقى كەزەڭدەردە وتەدى. ءبىر جىل بويى ارنايى تاپسىرمالاردى ورىنداۋعا دايىندىق بويىنشا جيىندار وتكىزىلەدى.

ماسەلەن، ارميالىق اۆياتسيانىڭ ۇشقىشتارى جوعارى بيىك تاۋلى الاڭدارعا ۇشۋعا، قۇرلىقتىڭ جانە سۋدىڭ ۇستىڭگى بەتىندە ىزدەۋ-قۇتقارۋ جۇمىستارىنا، سۋ اعىزۋ قۇرىلعىسىمەن جۇمىس جاساۋ جۇمىستارىنا، ءورتتى سوندىرۋگە قامدانادى. جەرۇستى نىسانالار بويىنشا اۆياتسيالىق پوليگونداردا وق اتۋلاردى وتكىزەدى. ماڭدايشەپتىك اۆياتسيانىڭ ۇشقىشتارىمەن كۇندىز- ءتۇنى اۋە مەجەلەرى بويىنشا باسقارىلاتىن زىمىرانداردى ىسكە قوسۋ بويىنشا جيىندار وتكىزىلەدى. اتالعان جيىنداردا دايىندىقتان بولەك، ءارتۇرلى ۇشۋ تاپسىرمالارىن ورىنداۋدىڭ، تاجىريبە الماسۋدىڭ ءبىرىڭعاي ادىستەمەسىنىڭ ازىرلەنۋى جۇزەگە اسىرىلادى.