مينيستر ەلىمىزدە قانداي قىلمىستىڭ ءجيى بولاتىنىن ايتىپ بەردى
بۇل تۋرالى بۇگىن ماجىلىستەگى جەرگىلىكتى پوليتسيا قىزمەتى تاقىرىبىنا ارنالعان ۇكىمەت ساعاتىندا ىشكى ىستەر ءمينيسترى قالمۇحانبەت قاسىموۆ ءمالىم ەتتى.
ءمينيستردىڭ ايتۋىنشا، قازاقستاننىڭ جالپى كريمينوگەندىك احۋالىندا بوتەننىڭ مۇلكىن ۇرلاۋعا قاتىستى قىلمىستار ۇلەسى الپىس پايىزدان اسادى. «ءتىپتى كەيبىر وڭىرلەردە ۇرلىققا قاتىستى قىلمىستىڭ ۇلەسى ودان دا جوعارى. سوسىن قىلمىستىڭ باسىم بولىگىن جەڭىل جانە ورتاشا اۋىر قىلمىستار قۇراپ وتىر. اتاپ ايتقاندا، ولاردىڭ ىشىندە قالتا تەلەفونى ۇرلىعى، كولىك توناۋ، قالتا ۇرلىعى جانە تاعى باسقالار بار. حالىق اراسىندا وسىنداي ۇساق قىلمىستار كەڭ ەتەك العان. شىندىعىندا، جۇرتشىلىقتىڭ پوليتسيانىڭ ۇرلىقپەن كۇرەسىنە كوڭىلى تولماۋى دا مۇمكىن. ويتكەنى، قۇقىق قورعاۋ ورگاندارى ۇرلىقپەن كۇرەستەگى احۋالدى جاقسارتا الماي كەلەدى. دەگەنمەن، جەرگىلىكتى پوليتسيانىڭ قىزمەتى وسى باعىتتاعى جاعدايدى جاقسارتادى دەگەن ۇمىتتەمىز»، - دەدى مينيستر ق. قاسىموۆ.
بۇل رەتتە ۆەدومستۆو باسشىسى ۇرلىقپەن كۇرەستە جالپى جۇرتشىلىق پەن اكىمدىكتەر دە ءوز وڭىرلەرىندە جەرگىلىكتى پوليتسيامەن بىرلەسە جۇمىستى جانداندىرۋى كەرەك.
اۆتور: قانات مامەتقازى ۇلى
