قازاق جالقاۋ دەگەن ءسوز - كەڭەس وداعىنان كەلگەن قۇلدىق سانا سەزىمى - مۇحتار تايجان
«كەيبىر اعالارىمىز وسىندا پىكىرلەرىن ايتىپ كەتتى، «قازاق - جالقاۋ، وكىنىشكە قاراي قولدارىنان ەشتەڭە كەلمەيدى» دەپ ايتتى. مەن ونىمەن مۇلدەم كەلىسپەيمىن. مەن ونى كەڭەس وداعىنان كەلگەن قۇلدىق سانا سەزىمى دەپ ەسەپتەيمىن. ماسەلەن ءبىز مىنا وتىرعان عيماراتتى كەرەك بولسا اۋىلداعى قاراپايىم قازاقتىڭ قولىمەن سالعان. استانادا دا تولىق سونداي. ءوز باسىم اسفالتتا تۋىپ وسكەنىممەن، سوڭعى ءۇش جىل ىشىندە اۋىل شاۋاشىلىعىمەن اينالىسامىن. شارۋالارمەن بىرىگىپ، پياز ەگەمىن. سوندىقتان ءبىزدىڭ شارۋالاردىڭ قولىنان ءبارى كەلەدى. ولارعا تەك مۇمكىندىك كەرەك دەپ ويلايمىن»، - دەدى ول.
مۇحتار تايجان جەر رەفورماسىنا قاتىستى سويلەي كەلە، پرەزيدەنتتىڭ «حالىققا ۇنامايتىن زاڭ بىزگە كەرەك ەمەس» دەگەن ءسوزىن دۇرىس دەپ ەسەپتەيتىنىن ايتىپ ءوتتى. «ال حالىق ءوز ۇستانىمىن، پىكىرىن ءۇش- ءتورت اپتانىڭ ىشىندە ايقىن ءبىلدىردى. حالقىمىز جەردى شەتەلدىكتەرگە نە جالعا بەرۋگە، نە ساتۋعا قارسى. ءبىزدىڭ ءرولىمىز حالىقتىڭ ۇستانىمىن، كەرەك بولسا تالابىن ورىنداۋ (...)»، - دەدى ول.
ايتا كەتەيىك، كەشە مۇحتار تايجان اقپارات جانە كوممۋنيكاتسيا ءمينيسترى داۋرەن ابايەۆتان جەر رەفورماسىنا نارازىلىق بىلدىرگەن قازاقستاندىق بەلسەندىلەردى بەلگىسىزدەر قارجىلاندىرىپ جاتىر دەلىنگەن دەرەكتەردى انىقتاۋدى سۇراعان بولاتىن. مۇحتار تايجان «ەۋرازيا» ءبىرىنشى ارناسىنىڭ شىعارىلىمدارى جايلى ايتىپ وتىرعان بولۋى مۇمكىن. ءساۋىر ايىنىڭ سوڭىندا بۇل تەلەارنادا «قازاقستاندا ايداپ سالۋلار ءۇشىن جاقسى تولەندى» دەگەن اتاۋمەن ۆيدەو جاريا بولعان ەدى، تىلشىلەرىنىڭ ايتۋىنشا، رۇقسات ەتىلمەگەن قازاقستاندىق بەلسەندىلەردىڭ ءارقايسىسىنا 50-150 دوللار ارالىعىندا اقشا تولەنگەن. سول كەزدىڭ وزىندە بۇل مالىمەت الەۋمەتتىك جەلىلەردە داۋ تۋعىزعان ەدى. قولدانۋشىلار بۇل دەرەكتەردىڭ كۇدىك تۋعىزاتىنىن ايتقان بولاتىن. ال 14 -مامىردا «ەۋرازيا» تەلەارناسى «بەلسەندىلەردى قارجىلاندىرۋ» تاقىرىبىندا ۆيدەو جاريا ەتتى. روليك «زاڭسىز جيىنداردىڭ قارجىلاندىرعانىنىڭ دالەلدەرى» دەگەن اتاۋمەن شىقتى.
ەسكە سالايىق، كەشە استانادا جەر رەفورماسى جونىندەگى كوميسسيانىڭ العاشقى وتىرىسى وتكەن بولاتىن. بۇل جيىن 7 ساعاتقا سوزىلدى. جيىن اياقتالعاندا پرەمەر-ءمينيستردىڭ ءبىرىنشى ورىنباسارى باقىتجان ساعىنتايەۆ جەر رەفورماسىن 7 ساعات بويى تالقىلاۋدىڭ ناتيجەسىن ايتتى. «مەنىڭ ويىمشا، بۇگىن ءبىز جاقسى سويلەستىك. ماسەلەنى 7 ساعات بويى تالقىلاعانىمىزدى بىلەسىزدەر. بۇگىن وسىندا 75 ادامنىڭ 70 ى كەلدى. 5 ادام بەلگىلى سەبەپتەرمەن، ءبىر ادام، ياعني ماكس بوقايەۆ وتىرىسقا قاتىسۋدان باس تارتتى. ول مۇلدە كەلمەيمىن دەگەن جوق. ونىڭ قانداي دا ءبىر تالاپتارى بار، بۇل ونىڭ جەكە باعىتى. ەگەر ول كەلگىسى كەلسە، ەسىگىمىز اشىق»، - دەدى ساعىنتايەۆ.
