07:46, 16 - مامىر 2016 | GMT +5
قىتايدا مۇسىلمانداردىڭ بۇكىل الەمدىك قالاسى پايدا بولادى
استانا. قازاقپارات - قىتاي ەلىندە الەم مۇسىلماندارى ات باسىن تىرەيتىن جاڭا تۋريستىك شاھار سالۋ جوسپارلانىپ وتىر، دەپ حابارلادى muslim.kz.
بەيجىڭنەن 960 شاقىرىم قاشىقتىقتا ورنالاسقان ينچۋان قالاسىن وسى ماقسات نەگىزىندە مۇسىلماندارعا ارناپ قايتا جابدىقتايتىن بولادى.
قالا كوشەلەرىندەگى بەلگىلەردىڭ اعىلشىن جانە اراب تىلىندە اۋدارماسى ىلىنەتىن بولماق. ال، شاھار ورتالىعىندا «مۇسىلمانداردىڭ بۇكىل الەمدىك قالاسى» اتتى اۋماق ورنالاسادى. ول جەردە يسلام ءدىنىنىڭ اسىل جادىگەرلەرى مەن مۇسىلماندار مادەنيەتىنىڭ وزىق ۇلگىلەرى سالىنادى.
جوبا 2020 -جىلى اياقتالۋى ءتيىس. قالا اۋەجايىنان جاقىن ارادا ساۋد ارابياسى، ب ا ءا، يوردانيا جانە مالايزيا ەلدەرىنە تىكەلەي اۋە جەلىسى اشىلادى.
