اتىراۋدا وزەندە سەلفي ءتۇسىرۋ وقيعاسى قايعىلى جاعدايمەن اياقتالدى

استانا. قازاقپارات - اتىراۋدا جايىق وزەنىندە ءتورت ەر ادام مىنگەن قايىق اۋدارىلدى.

امان قالعانداردىڭ سوزدەرىنە قاراعاندا، دوستار تۇنگى ۋاقىتتا وزەندە قايىقپەن ءجۇزىپ، سۋرەتكە تۇسپەك بولعان.

سەنبىدەن جەكسەنبىگە قاراعان ءتۇنى قالا ماڭىنداعى بەسىكتى كەنتىندە ءتورت جىگىت وتىرعان قايىق اۋدارىلدى، دەپ حابارلادى ATPress.

«امان قالعانداردىڭ سوزىنە قاراعاندا، قالا ماڭىنداعى بىرلىك كەنتىنىڭ 1992 جانە 1981-جىلدارى تۋعان تۇرعىندارى باتىپ كەتتى. ولار سەنبى كۇنى كەشكە دوستارىمەن پيكنيككە شىققان، كەيىن قولدان جاسالعان قايىقپەن سۋدا جۇزۋگە بەل بۋىپتى. قاراڭعىدا بۇل قايىق اۋدارىلادى. ەكەۋىنىڭ ءبىرى تورتەۋى سپيرتتىك ىشىمدىك ىشكەنىن مويىندادى»، - دەدى باتىس ايماقتىق اەروموبيلدى جەدەل-قۇتقارۋ جاساعىنىڭ باسشىسى باحتيار قادىرحانوۆ.

ول قايعىلى وقيعا تۋرالى حابار قۇتقارۋشىلارعا تۇنگى ساعات ەكىدە تۇسكەنىن، تاڭ اتقان سوڭ قازا تاپقانداردىڭ ءمايىتىن ىزدەۋ جۇمىستارى جۇرگىزىلگەنىن ايتتى. وقيعا ورنىندا جانە ونىڭ ماڭايىندا وزەندە جەتى سۇڭگۋىر-قۇتقارۋشى جۇمىس ىستەۋدە. ءۇش قايىق پەن ەكى بىرلىك تەحنيكا تارتىلدى. سونىمەن قاتار، بالىق ينسپەكتسياسىنىڭ «ك س» ماركالى ءبىر كاتەرى ىزدەۋ جۇمىستارىنا پايدالانىلادى.