قازاقستاندا جەردى جەكەشەلەندىرۋگە اسىقپاۋ قاجەت - ا. پەرۋاشەۆ
«جەكە مەنشىك - نارىقتىق ەكونوميكانىڭ نەگىزى. اۋىل شارۋاشىلىعىندا ونىڭ سالماعىن باعالاۋ ءتىپتى مۇمكىن ەمەس. سەبەبى جالعا الىنعان جەرگە بانك نەسيە بەرمەيدى، سونىڭ كەسىرىنەن دامۋعا قول بايلاۋ بولىپ وتىر»، - دەدى ا. پەرۋاشەۆ كوميسسسيانىڭ العاشقى وتىرىسىندا.
ەگەر جەر جەكە مەنشىكتە جەر بولسا، ونى نارىقتىق اينالىمعا شىعارۋ وڭاي، قوسىمشا قاراجات كوزدەرىن تابۋ دا قيىنعا سوقپايدى.
«ءبىراق مەنىڭشە، جەردى جەكەشەلەندىرۋدە اسىعىستىق جاساماعان دۇرىس. سەبەبى كوبى جەر ساتىپ الۋعا ءالى دايىن ەمەس»، - دەدى دەپۋتات.
«ونىڭ ۇستىنە جەكە مەنشىككە بەرۋدىڭ تەتىكتەرىنە جانە تارتىبىنە قاتىستى ساۋالدار بار. مۇندا ءبىز قادام قاداممەن، كەزەڭ بويىنشا ءجۇرىپ وتىرىپ، جەردى شەنەۋنىكتەردىڭ تۋىستارى مەن تانىستارىنا ەمەس، شىنىمەن جەرمەن جۇمىس ىستەيتىن ادامدارعا بەرىلۋىن قامتاماسىز ەتەتىن اشىق مەحانيزمدەر جاساۋىمىز كەرەك»، - دەدى ول.
ايتا كەتەيىك، بۇگىن استانادا جەر رەفورماسى بويىنشا كوميسسيانىڭ العاشقى وتىرىسى ءوتتى. كوميسسيا ق ر پرەزيدەنتى ن. نازاربايەۆتىڭ تاپسىرماسىمەن قۇرىلعان بولاتىن.
كوميسسيا ءتوراعاسى بولىپ ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ، ونىڭ ەكى ورىنباسارى - «نۇر وتان» پارتياسىنىڭ ءبىرىنشى ورىنباسارى مۇحتار قۇل-مۇحاممەد پەن ەكىنشى ورىنباسارى (كەلىسىم بويىنشا) «جاقسىلىق» شارۋا قوجالىعىنىڭ باسشىسى، قوعام قايراتكەرى جاقسىلىق ۇشكەمپىروۆ بولىپ بەكىتىلدى.
اۆتور: جاسۇلان جولدىبايەۆ
