ەلىمىزدە اسكەري تەحنيكالار جازعى پايدالانۋ رەجىمىنە كوشىرىلۋدە
بۇل باعىتتاعى بەلسەندى جۇمىستى «وڭتۇستىك» وڭىرلىك قولباسشىلىعىنا قاراستى 01731 اسكەري ءبولىمىنىڭ اسكەري قىزمەتشىلەرى العاشقىلاردىڭ ءبىرى بولىپ باستادى. تەحنيكانى جازعى رەجىمگە كوشىرۋ بويىنشا ءىس- شارالار ءداستۇرلى بولىپ سانالادى. جىل سايىن اسكەري تەحنيكانىڭ ءارقايسىسىنا، قارۋ- جاراق پەن اسكەري تەحنيكاعا، پارك- گاراج جابدىعىنا ماۋسىمدىق قىزمەت كورسەتۋ جونىندە كەشەندى جۇمىستار جۇرگىزىلەدى. قارۋ- جاراق پەن اسكەري تەحنيكاعا ماۋسىمدىق قىزمەت كورسەتۋ جىلىنا 2 رەت جۇزەگە اسىرىلادى. جازعى كەزەڭگە پايدالانۋعا دايىندالاتىن تەحنيكالار قاتارىندا زىمىران- ارتيللەريالىق قارۋ- جاراعى، اۆتوموبيلدى جانە بروندى تانك تەحنيكاسى بار.
اسكەري قىزمەتشىلەر جانار- جاعارماي ماتەريالدارىنىڭ قىسقى تۇرلەرىن جازعىسىنا اۋىستىردى. الدىن الۋ ءىس- شارالارى بارىسىندا قوزعالتقىشتار، ءجۇرىس بولىكتەرى مەن ت. ب. جۇمىسىن قامتاماسىز ەتەتىن جۇيەلەرگە قىزمەت كورسەتىلىپ، دايىندالادى. تەحنيكا مەن قارۋ- جاراق ۇدايى نەگىزدە ءبۇتىن كۇيدە جانە جاۋىنگەرلىك ازىرلىكتە بولۋى ءتيىس. بۇعان اتالمىش تەحنيكانى ۇقىپتى ۇستاۋ جانە ونى ۋاقىتىلى باپتاۋ نەگىزىندە قول جەتكىزۋگە بولادى.
