ءار ادامعا ساتىلاتىن جەردىڭ مولشەرلەنگەن شەگى بولۋى ءتيىس - ق. ايتاحانوۆ
جەر رەفورماسى بويىنشا كوميسسيانىڭ العاشقى وتىرىسىندا قازاقستان رەسپۋبليكاسى پارلامەنت سەناتىنىڭ دەپۋتاتى، كوميسسيا مۇشەسى قۋانىش ايتاحانوۆ وسىلاي دەدى.
«قازاقتا «يەسىز قالعان جەر جەتىم» دەگەن ءسوز بار. جەر بوس جاتپاۋى كەرەك. يەسىز جاتقان جەر توزادى. سول سەبەپتى بۇل جەردى حالىقتىڭ ىرىسى رەتىندە پايدالانۋىمىز قاجەت. ءبىزدىڭ بارلىعىمىزدىڭ نەگىزگى ماقساتىمىز، جەر كودەكسىنە ەنگىزىلگەن وزگەرىستەردىڭ نەگىزگى ماقساتى - جەرگە مەنشىك يەسىن تابۋ، ونىڭ قۇنارلىعىن ارتتىرۋ، ءتيىمدى پايدالانۋ. مەنشىك يەسىن تابۋدىڭ جولى، مەنىڭشە، ونى ازاماتتارعا ساتۋ دەگەن ءسوز. «وزىمدىك دەگەندە وگىز قارا كۇشىم بار»، دەيدى. جالعا بەرۋ ءبىر بولەك. جالعا بەرىلگەن كوپ جەرلەر بوس جاتىر. ارام ءشوپ ءوسىپ كەتكەن، ال ەگەر ول ءوزىڭنىڭ اقشاسىن بەرىپ، ساتىپ الاتىن بولسا، وعان دەگەن ونىڭ كوزقاراسى باسقاشا بولادى»، - دەدى سەناتور.
ءبىراق، ق. ايتاحانوۆ جەردىڭ ساتىلۋ مولشەرى دە بولۋى كەرەكتىگىن باسا ايتتى.
«كەيبىر ازاماتتار 100 دەگەن مىڭ گەكتار جەر الىپ العان. ونىڭ كوپتەگەن جەرى پايدالانىلماي جاتىر. سول سەبەپتى جەردى ساتۋدا ونىڭ مولشەرىن بەكىتۋىمىز كەرەك. ءبىر ادامعا دەگەن مولشەر بولۋى ءتيىس. ول ءار اۋداندا، ءار وبلىستا جەردىڭ جاعدايىنا، وڭىرلىك كليماتىنا بايلانىستى ءارتۇرلى بولاتىن شىعار»، - دەدى ول.
سونىمەن قاتار ول جەردى ساتىپ الۋعا شاماسى كەلمەيتىن ازاماتتار زاڭدا دا كورسەتىلگەندەي جەردى 49 جىلعا جالعا الا الاتىندىعىن، جاعدايى كەلگەندە 50 پايىزدىق ارزانداتىلعان باعامەن 10 جىلدىڭ ىشىندە ساتىپ الۋعا مۇمكىندىگى بار ەكەندىگىن اتاپ ءوتتى.
«ءبىراق ءبىر تالاپ، ول جەرگە قوجايىن رەتىندە قاراۋى كەرەك. ودان ءونىمدى مول الۋى قاجەت. ءوزى دە بايۋى كەرەك، ەلىمىزدە دە ازىق-تۇلىك مولشىلىعىن جاساۋى ءتيىس. ول وسى تالاپتى ورىنداسا بولدى»، - دەدى ق. ايتاحانوۆ.
اۆتور: مارلان جيەمباي
