م. قۇل- مۇحاممەد: جەردىڭ تاريحىنا الاڭداۋشىلىق بىلدىرگەن ءار ازاماتقا راحمەتىمىزدى ايتۋىمىز كەرەك

استانا. قازاقپارات - جەردىڭ تاريحىنا الاڭداۋشىلىق بىلدىرگەن ءار ازاماتقا راحمەتىمىزدى ايتۋىمىز كەرەك. جەر رەفورماسى بويىنشا كوميستسيانىڭ العاشقى وتىرىسىندا « نۇر وتان» پارتياسى ءتوراعاسىنىڭ ءبىرىنشى ورىنباسارى، كوميستسيا ءتوراعاسىنىڭ ورىنباسارى مۇحتار قۇل- مۇحاممەد وسىلاي دەدى.

 « جەردىڭ تاريحىنا الاڭداۋشىلىق بىلدىرگەن ءار ازاماتقا، وعان ءوز پىكىرىن قوسقىسى كەلەتىن ازاماتقا ءبىز راحمەتىمىزدى ايتۋىمىز كەرەك. سول ءۇشىن ەلباسىمىز 5 - مامىر كۇنى بۇل زاڭعا بۇكىل حالىقتىڭ كوزىنشە موراتوري جاريالادى. وسى زاڭعا ۇسىنىس ەنگىزەمىن، تولىقتىرۋ جاسايمىن، جەتىلدىرەمىن دەگەن ازاماتتاردىڭ بارلىعىنا ايقارا ەسىك اشىپ وتىر. ەلباسىنىڭ ءسوزىن تاعى ءبىر مارتە قايتالاپ ايتايىن: « حالىققا قاجەتى جوق زاڭنىڭ، بىزگە دە قاجەتى جوق»، دەدى. مىنە سوندىقتان حالىقتىڭ وكىلدەرى رەتىندە سىزدەر پىكىرلەرىڭىزدى ايتىپ وتىرسىزدار. سونىڭ بارلىعى ەسكەرىلەتىن بولادى دەپ ەسەپتەيمىن»، - دەدى ول.

سونىمەن قاتار م. قۇل- مۇحاممەد ەل مەن جەر مەملەكەتىمىزدى قۇرايتىندىعىن، ال مەملەكەتىمىزدىڭ ەڭ قاسيەتتى قۇندىلىعى تاۋەلسىزدىك ەكەندىگىن باسا ايتتى.

 « 1995 - جىلدان 2001 - جىلعا دەيىن 6  جىل بويى بارلىق شەتەلدىكتەرگە قازاقستاننان 99 جىل مەرزىمگە جالعا جەر الۋعا مۇمكىندىك بولعان، زاڭدا. ءبىراق، قازاقتىڭ جەرىن ەشكىم تالاپ الىپ كەتكەن جوق. ويتكەنى، مۇنى باسى- قاسىندا قاراپ وتىرعان ازاماتتار بار. سول سەبەپتى وسى بۇگىنگى وتىرىسىمىز بەرەكە- بىرلىكپەن، ءبىر- ءبىرىمىزدى تىڭداۋمەن، ءبىر- ءبىرىمىزدىڭ پىكىرىمىزگە قۇلاق اسۋمەن باستالىپ جاتىر»، - دەدى كوميستسيا ءتوراعاسىنىڭ ورىنباسارى.