ءوڭىر اكىمدىكتەرى جانىنان قۇرىلعان قوعامدىق كوميسسيالاردىڭ دا جەرگە قاتىستى پىكىرلەرى ەسكەرىلەدى - م. قۇل-مۇحاممەد
جەر رەفورماسى بويىنشا كوميسسيانىڭ العاشقى وتىرىسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى - كوميسسيا ءتوراعاسىنىڭ ورىنباسارى مۇحتار قۇل-مۇحاممەد ايتتى.
«18 ميلليون حالىقتىڭ بارلىعىن بىردەي ءبىر عيماراتقا جيناپ، بارلىعىنىڭ پىكىرىن تىڭداۋ قيىن بولار. ءبىراق، وسىندا وتىرعان ءاربىر ساياسي پارتيا، ءاربىر قوعامدىق ۇيىم، ءاربىر مەملەكەتتىك ەمەس ۇيىم قوعامنىڭ ءارتۇرلى سالاسىنداعى ازاماتتاردىڭ پىكىرىن جەتكىزۋشىلەر دەپ ەسەپتەيتىن بولساق، بۇل حالىقتىق كەلىسىمگە شاقىرىپ وتىرعان كوميسسيا دەپ ايتۋعا تولىق نەگىزىمىز بار. ەكىنشىدەن، كوميسسيانىڭ ءاربىر مۇشەسىنىڭ داۋىسى دا، قۇقىعى دا بىردەي. باقىتجان ءابدىر ۇلىنىڭ دا ءبىر داۋىسى بار، مۇحتار تايجان باۋىرىمىزدىڭ دا ءبىر داۋىسى بار. ءبارىمىز ءبىر-ءبىرىمىزدى تىڭداۋ ءۇشىن، پىكىرلەرىمىزدى ەسكەرۋ ءۇشىن كەلىپ وتىرمىز»، - دەدى م. قۇل-مۇحاممەد.
سونىمەن قاتار ول ءاربىر وبلىس اكىمدىگىنىڭ جانىنان قوعامدىق كەڭەستەردىڭ قۇرىلىپ جاتقاندىعىن، وعان جەر ماسەلەسىن قازاقستاننىڭ ءاربىر وبلىسىندا قالالارىندا، اۋداندارىندا كوتەرىپ جۇرگەن، حالىقتىڭ پىكىرىن ايتىپ جۇرگەن ازاماتتار كەڭىنەن ەنگىزىلگەندىگىن اتاپ ءوتتى.
«ولاردىڭ پىكىرى دە ءبىزدىڭ پىكىرىمىزدىڭ ءبىر بولىگى بولىپ ەسەپتەلىنەدى جانە ولاردىڭ پىكىرى كۇندەردىڭ كۇنى كەلگەندە وسى كوميسسيادا قارالىپ، ەسكەرىلەتىن بولادى. بۇل كوميسسيا پىكىرى بارلىق وڭىرلەردەن جينالعان جيىنتىق پىكىر بولىپ سانالادى. جەر قازاق ۇعىمىندا تەك ماتەريالدىق يگىلىكتەردىڭ عانا ەمەس، ۇلكەن رۋحاني يگىلىكتەردىڭ كوشباسى. ەلباسىمىزدىڭ سوزىنە بەكبولات (تىلەۋحان) باۋىرىمىزدىڭ ءار قازاقتىڭ ەڭىرەگەندە ەتەگى جاسقا تولاتىنداي قىلىپ جازعان «ەلىم مەنىڭ، جەرىم مەنىڭ» دەگەن ءانى ءار قازاقتىڭ جۇرەگىنەن ورىن الۋى سوندىقتان بولار»، - دەدى ول.
اۆتور: مارلان جيەمباي
