قانات يسلام: گەنا ەكەۋمىزدى جۇدىرىقتاستىرعىسى كەلەتىندەردى مەن تۇسىنبەيمىن
- قانات اعا، سوڭعى كەزدەرى الەۋمەتتىك جەلىلەردە، سايتتاردا ءسىزدى گەنادي گولوۆكينمەن جەكپە-جەككە شىعادى دەگەن جازبالار كوپ جازىلىپ جاتىر. وسى ماسەلەنىڭ اق-قاراسىن اشىپ ايتىپ بەرىڭىزشى. بۇگىن وسى تاقىرىپقا نۇكتە قويايىقشى. گەنامەن جۇدىرىقتاۋىڭىز مۇمكىن بە؟
- مەن گەنانى دوسىم رەتىندە، چەمپيون رەتىندە، اعام رەتىندە قاتتى سىيلايمىن. گەنا - كوك تۋدى جەلبىرەتىپ جۇرگەن قازاقتىڭ باتىرى. گەنا ەكەۋمىزدى جۇدىرىقتاستىرعىسى كەلەتىندەردى مەن تۇسىنبەيمىن. وكىنىشكە قاراي، قازىر كوپ ادام جەكە باستىڭ مۇددەسىن ويلايدى.
ءبىز ۇلتتىق دەڭگەيدە ويلانساق قانا وزگەگە مازاق بولمايمىز. بىزگە ەكى قازاقتىڭ شەتەلدە ءبىر-بىرىمەن جۇدىرىقتاسقانى كەرەك پە؟ الدە، شەتەلدە ەكەۋى ەكى جاقتان كوك تۋدى جەلبىرەتىپ جۇرگەنى كەرەك پە؟ بىزگە قايسىسى قىزىق؟ قايسىسى ماڭىزدى؟ الدىمەن وزىمىزگە وسى سۇراقتى قويىپ كورەيىكشى. قىتايدا ەرەجەسىز جەكپە-جەكتە ءبىر-بىرىنە قول كوتەرمەگەن قازاقتاردى بىلەسىزدەر.
ءبىز گەنا ەكەۋمىز سول جىگىتتەر سياقتىمىز. گولوۆكين ون جەتى ميلليون قازاقستاندىقتاردىڭ الدىندا «مەن - قازاقپىن!» دەگەنىن ەستىدىڭىزدەر. مەن گەنانى ءوزىمنىڭ باۋىرىم دەپ ەسەپتەيمىن. ءبىز - قازاقپىز. وزگە ەلدىڭ الدىندا ءبىر-ءبىرىمىزدى سابامايمىز.
اتا-بابامىز: ««جاقسى ءسوز جارىم ىرىس» دەيدى. جاقسى ءسوز ول - باتا. باتا - ول دۇعا. ازاماتتىقتىڭ ەڭ بيىك دەڭگەيى قولىمەن جاردەم بەرۋ. وعان شاما كەلمەسە جاقسى ءسوز ايتىپ، دەمەۋ بولۋ. ال، وعان دا شاما كەلمەسە - ۇندەمەۋ. ال، ازاماتتىقتىڭ ەڭ تومەن دەڭگەيى ول جاقسى ءسوزدى قيماۋ، كورە الماۋ. اللا ءبىزدى وسىدان ساقتاسىن. قازاقتار ءبىر-ءبىرىن كوتەرمەلەسە عانا، وزگەلەردىڭ ۇلتىمىزعا دەگەن قۇرمەتى ويانادى.
گەنا ەكەۋمىزدىڭ جۇدىرىقتاسقانىمىزدان ءبىز ەشتەڭە ۇتپايمىز. كەرىسىنشە ۇلت رەتىندە ۇتىلامىز. ۇلتتىق دەڭگەيمەن ويلاپ قاراساڭىز، الەم الدىندا ماسقارا بولامىز. كەيبىرەۋلەر، بۇل - سپورت. ءبارى مۇمكىن. جۇدىرىقتاسقاندا تۇرعان نە بار دەيتىن شىعار.
مەن سپورتشىدان بۇرىن - قازاقپىن. ماعان سپورتتاعى جەتىستىك ەمەس، ماعان قازاقتىڭ الەم الدىنداعى ابىرويى مەن بەدەلى قىمبات. گەنا كوك تۋدى كوتەرىپ جۇرگەن ءبىزدىڭ سەركەمىز. تۋىمىز جىعىلماسىن دەپ گەنانىڭ ارتىندا تۇرسام دا، مەن ءۇشىن ۇلكەن ابىروي.
كوپ ىنىلەرىم ماعان: «اعا، ءسىز سياقتى بولعىمىز كەلەدى»، - دەيدى. مەن ولارعا: «مەن سياقتى بولماڭدار. مەنەن دە مىقتى بولىڭدار»، - دەيمىن.
بىزدەن دە مىقتىلار شىقسا ءبىز ۇتىلمايمىز، كەرىسىنشە ءبىز ۇتامىز. الەمدى مويىنداتامىز. تاريحتا باتىر بابالارىمىز جاستارعا بىلگەنىن ۇيرەتىپ، وزدەرىنەن دە مىقتى قىلىپ تاربيەلەگەن. مەن دە سول بابالارىمىز سياقتى، جۇرەگىندە وتى بار جاستاردى قاسىما الىپ، وزىمنەن دە مىقتى قىلىپ تاربيەلەگىم كەلەدى. قازاقتىڭ جۇرەك جۇتقان ۇلتجاندى سپورتشىلارى كوبەيسە، الەم سپورتشىلارى بىزگە قاراپ بوي تۇزەيتىن بولادى.
