ۇزدىك ستريتبولشىلار استانادا كەزدەسەدى
وعان 30 دان استام مەملەكەتتىڭ سپورتشىلارى قاتىسپاق. ويىندار «استانا وپەرا» تەاترى عيماراتىنىڭ جانىنداعى الاڭدا وتكىزىلەدى، دەپ حابارلادى قالا اكىمىنىڭ باسپا ءسوز قىزمەتى.
200 استام سپورتشى كوشە باسكەتبولىن وينايدى. جارىس بارىسىندا ەرلەر مەن ايەلدەر كوماندالارى ءتورت توپتا شەبەرلىك بايقاسادى. قازاقستاننىڭ ەرلەر قۇراماسى «س» توبىندا ونەر كورسەتىپ، رۋمىنيا، يندونەزيا، يتاليا جانە كاتار كومانالارىمەن كۇش سىناساتىن بولادى. ەلىمىزدىڭ ايەلدەر قۇراماسى نيدەرلاندى، ا ق ش، يتاليا جانە پولشا كوماندالارىمەن «ۆ» توبىندا كەزدەسەدى.
الەم بىرىنشىلىگىن ۇيىمداستىرۋشىلار - قازاقستان ستريتبول ليگاسى (SLK)، ق ر ۇلتتىق باسكەتبول فەدەراتسياسى جانە FIBA 3х3.
- كوشە باسكەتبولى نەمەسە ستريتبول قازىرگى زامانعى قالا مادەنيەتىندە - ەڭ دەموكراتيالىق سپورت، ونى جاستار وينايدى. ستريتبول ادامداردى بىرىكتىرىپ، ولارعا سەنىم بەرەدى، ۇلكەن جەتىستىكتەرگە قول جەتكىزۋگە قۇشتارلىقتى وياتادى، - دەيدى SLK پرەزيدەنتى نۇرلان قۇسايىنوۆ.
كورەرمەندەر نازارىنا ستريتبولدان 3х3 فورماتىنداعى كەزدەسۋلەر مەن ويىن-ساۋىق باعدارلامالارى ۇسىنىلماق. باسكەتبول مەن ستريتۆوركاۋتتان شەبەرلىك دارىستەرى وتكىزىلەدى، چيرليدەرلەر، برەيكدانسەرلەر مەن قالا مادەنيەتىنىڭ باسقا دا وكىلدەرى ونەر كورسەتپەك. ەلوردادا العاش رەت باسكەتبول فريستايلەر جانە ۇشاتىن اكروبات-باسكەتبولشىلار كوماندالارى ءوز شەبەرلىكتەرىن ورتاعا سالادى. ارتىستەر قالا قوناقتارىن ەلىمىزدىڭ ۇلتتىق ەرەكشەلىكتەرىمەن تانىستىرادى. ال كىشكەنتاي استانالىقتار ءۇشىن ارنايى ايماق ۇيىمداستىرىلادى.
ايتا كەتەيىك، وسى كۇندەرى بۇقارالىق تۋرنيرلەر، سونىڭ ىشىندە استانا كۋبوگى وتكىزىلەدى. جارىستاردا 10 جاستان اسقانداردىڭ بارلىعى باعىن سىناي الادى.
شارالار بەلگىلى ديدجەيلەر حيتتەرىنىڭ سۇيەمەلدەۋىمەن وتكىزىلەدى. شارانىڭ اشىلۋىندا قازاقستاندىق جانە رەسەيلىك جۇلدىزدار ونەر كورسەتەدى.
جارىس 1- ماۋسىمدا ساعات 13:00 باستالادى. سپورتتىق دودالاردى Kazsport تەلەارناسىنان جانە FIBA- نىڭ Youtube-تاعى رەسمي كانالىنان تىكەلەي ەفيردەن تاماشالاۋعا بولادى.
