استانادا جاستار مەن جاسوسپىرىمدەر اراسىندا تەمەكى شەگۋگە قارسى كۇرەس تالقىلاندى
استانا قالاسى سالاۋاتتى ءومىر سالتىن قالىپتاستىرۋ ورتالىعىنىڭ ديرەكتورى اقمارال قۇرمانبايەۆا تەمەكى شەگۋدىڭ بارشا الەمدە ادامداردىڭ ءولىمىنىڭ باستى سەبەپتەرىنىڭ ءبىرى بولىپ تابىلاتىنىن اتاپ ءوتتى. سوندىقتان بۇل ماسەلە اسا وزەكتى، اسىرەسە بالالار مەن جاسوسپىرىمدەردىڭ تەمەكى شەگۋى ماسەلەسى قاتتى الاڭداتادى، - دەدى ول.
مەديتسينالىق- الەۋمەتتىك وڭالتۋ ورتالىعى باس دارىگەرىنىڭ ورىنباسارى گاۋھار بەكتايەۆانىڭ ايتۋىنشا، جىل سايىن تەمەكى شەگەتىن ادامدار سانى ۇلعايادى، ولار نەگىزىنەن دارىگەردىڭ كومەگىنە جۇگىنبەيدى.
- 2015 -جىلى استانا بويىنشا نيكوتينگە ءۇيىر بولعان كامەلەتكە تولماعان 70 بالا تىركەلدى، سونىڭ ىشىندە 11 جۋىعى 14 جاسقا دەيىنگى بالالار. بۇل اسا كۇردەلى ماسەلە. قازىرگى كەزدە جاستار اراسىندا تەمەكى تارتۋ سانگە اينالدى. اسىرەسە، ءجاسوسپىرىم قىزداردىڭ اراسىندا. ارينە، نيكوتين - بۇل زاڭدى پسيحواكتيۆتى زات، ونى كەز كەلگەن دۇكەننەن ساتىپ الۋعا بولادى. قوعامدىق جەرلەردە تەمەكى شەگۋگە تىيىم سالىنىپ، ناقتى شارالار قابىلدانۋدا، مىسالى، كامەلەتكە تولماعان بالالارعا تەمەكى ساتقانى ءۇشىن اكىمشىلىك ايىپپۇلدار سالىنادى، ال شىندىعىندا ءبارى باسقاشا، ادامداردىڭ بارلىعى تەمەكى شەگەدى، قۇرامىنا تاباك پەن باسقا دا زاتتار كىرەتىن ناسىباي اتادى، وسىنىڭ بارلىعى جاس اعزانىڭ دامۋىنا اسەر ەتەدى. بۇل تەمەكىگە تاۋەلدىلىككە اپارادى، سوندىقتان ونىمەن كۇرەسۋ كەرەك، - دەدى گاۋھار بەكتايەۆا.
ءوز كەزەگىندە استانا قالاسى ىشكى ىستەر دەپارتامەنتى ەسىرتكى بيزنەسىنە قارسى كۇرەس ءبولىمىنىڭ باسشىسى پوليتسيا پودپولكوۆنيگى سەرگەي يلينىح ەلەكتروندى كاليان شەگەتىن جاستاردىڭ كوبەيگەنىن، وعان دا سينتەتيكالىق زاتتاردىڭ قوسىلاتىنىن، ادامدار تاۋەلدىلىككە سالىناتىنىن جەتكىزدى.
- ءبىز تەمەكى قوسپالارىن تەكسەرۋ بويىنشا جۇمىستاردى قولعا الىپ، رەيدتەر وتكىزەمىز. قازىرگى كەزدە تاماق ىشەتىن ورىندار اۋماعىندا تەمەكى شەگۋگە تىيىم سالاتىن زاڭ دا قولداۋ تاپتى. وسىعان وراي، ساۋدا ورىندارىندا جانە جاستار دەمالاتىن ورىنداردا دا رەيدتەر جۇرگىزىلەدى. ناسىباي دا تاركىلەنەدى، - دەدى سەرگەي يلينىح.
سونىمەن قاتار، تەمەكى شەگۋگە قارسى كۇرەس بويىنشا باسقا دا شارالار قابىلدانۋدا. استانا قالاسىنىڭ دەنساۋلىق ساقتاۋ باسقارماسى ءتۇرلى ساۋىقتىرۋ اكتسيالارىن، ۇزدىك سپورتتىق وتباسى كونكۋرسىن، جۇگىرۋلەر، قالالىق پاركتەر مەن ساياباقتاردا گيمناستيكا جاتتىعۋلارىن جاساۋدى جانە ت. ب. ۇيىمداستىرادى. اتالعان شارالار ءتۇرلى جاستاعى ادامدارعا ارنالعان، ويتكەنى تەمەكى شەگەتىن بالالار سانىن ازايتۋ ءۇشىن ءبىرىنشى كەزەكتە، ەرەسەكتەكتەردىڭ وزدەرى بۇل زياندى ادەتتەن ارىلۋى كەرەك.
جىل سايىن ەلىمىزدە 1-31 -مامىر ارالىعىندا دۇنيەجۇزىلىك تەمەكى شەگۋگە قارسى كۇرەس كۇنىنە وراي ايلىق وتكىزىلەدى. قۇقىق قورعاۋ ورگاندارى، ءبىلىم، دەنساۋلىق ساقتاۋ جانە باسقا دا مۇددەلى ۆەدومستۆولار بىرلەسىپ، قوعام نازارىن بالالار مەن جاسوسپىرىمدەردىڭ تەمەكى شەگۋى ماسەلەسىنە اۋدارماق، سونداي- اق، جاس ۇرپاقتىڭ دەنساۋلىعىنا قاتەر توندىرەتىن تەمەكى شەگۋگە قارسى كۇرەس بويىنشا كەڭ اۋقىمدى جۇمىستار جۇرگىزەدى.
