وزبەكستاندا وقۋشىلارعا مەشىتكە بارۋعا تىيىم سالىنادى

استانا. قازاقپارات - وزبەكستان بيلىگى وقۋشىلارعا جازعى دەمالىس كەزىندە مەشىتتەرگە بارۋعا تىيىم سالادى.

مامىر ايىنىڭ باسىندا ءاندىجان وبلىسىنداعى وقۋشىلاردىڭ اتا-انالارى ءبىلىم مينيسترلىگىنىڭ جەرگىلىكتى بولىمشەلەرىنەن جازعى دەمالىس كەزىندە وقۋشىلارعا تىيىم سالىناتىن ىستەر جونىندە «كەپىل حات» العان، دەپ جازادى centralasian.org.

بۇل قۇجاتتىڭ كوشىرمەسىن ازاتتىقتىڭ وزبەك قىزمەتى جاريالادى. حاتتا اتا- انالار بالالارىنىڭ ءتارتىپتى بولۋىن، ءدىني اعىمدارعا ىلەسىپ كەتپەۋىن، مەشىتتەرگە بارىپ قۇلشىلىق ەتپەۋىن قاداعالاۋى ءتيىس دەلىنگەن (سوڭعى ەكى ەسكەرتپەنىڭ استى سىزىپ بەلگىلەنگەن).

مەكتەپ وقۋشىلارىنا سونىمەن بىرگە قايىر تىلەۋگە، بەنزين ساتۋعا، بازاردا جۇمىس ىستەۋگە جانە اۆتوكولىكتەردى جۋىپ اقشا تابۋعا تىيىم سالىنادى.

ءبىلىم مينيسترلىگىنىڭ حاتىنا قول قويعان اتا- انالاردىڭ بالالارى كەشكى ساعات 18:00 دەن كەيىن ەرەسەكتەردىڭ قاراۋىنسىز ۇيلەرىنەن شىعىپ ينتەرنەت، ويىن كلۋبتارىنا بارا المايدى.

ولاي بولماعان جاعدايدا اتا-انالار زاڭعا سايكەس جازالانادى دەلىنگەن. بۇل حات مەشىت قىزمەتكەرلەرىنە دە جىبەرىلگەن. ماسەلەن، ءاندىجان وبلىسىنىڭ مەشىتتەرىندە «بالالارعا كىرۋگە تىيىم سالىنادى» دەگەن جازۋلار ءىلىنىپ قويعان.