ۆ. ماتۆيەنكو: «ۆوستوچنىي» عارىش ايلاعى ىسكە قوسىلعانىنا قاراماستان، رەسەي «بايقوڭىردا» جۇمىسىن جالعاستىرادى

استانا. قازاقپارات - رەسەي تاراپى «بايقوڭىردى» پايدالانۋ بويىنشا قازاقستانمەن ىنتىماقتاستىقتى جالعاستىرادى.

بۇل تۋرالى بۇگىن ق ر پارلامەنتى سەناتىنىڭ ءتوراعاسى قاسىم-جومارت توقايەۆپەن كەزدەسكەننەن كەيىن ر ف فەدەرالدىق جينالىسى فەدەراتسيا كەڭەسىنىڭ ءتوراعاسى ۆالەنتينا ماتۆيەنكو ءمالىم ەتتى.

«بۇگىندە «بايقوڭىر» عارىش ايلاعىن پايدالانۋ بويىنشا قازاقستان مەن رەسەي قاتىناستارى ەكى تاۋەلسىز مەملەكەتتەر رەتىندە جاڭا قۇقىقتىق نەگىزدە قۇرىلۋدا. بىزدەر 2050-جىلعا دەيىن «بايقوڭىردى» جالعا الۋ تۋرالى كەلىسىمدى بەكىتتىك، سونداي-اق عارىش كەڭىستىگىن يگەرۋدە ءبىزدىڭ بىرلەسكەن بەلسەندى قىزمەتتەر ءۇشىن بارلىق قۇقىقتىق جاعدايلار جاسالدى. شىنىمەن دە جاڭا «ۆوستوچنىي» عارىش ايلاعىنان زىمىران تاسىعىشتىڭ ۇشىرىلۋى رەسەي ءۇشىن ۇلكەن وقيعا بولدى. بۇل ءبىز ءۇشىن وتە ماڭىزدى. دەگەنمەن دە «بايقوڭىردى» پايدالانۋ بويىنشا قازاقستانمەن ىنتىماقتاستىقتى توقتاتپايتىنىمىز انىق»، - دەدى ۆ. ماتۆيەنكو.

وسى رەتتە ول «بايقوڭىر» سۇرانىسقا يە ەكەنىن جانە ۇزاق ۋاقىت بويى پايدالانىلاتىنىن اتاپ ءوتتى.

«اتاپ ايتقاندا، «ۆوستوچنىي» جانە «بايقوڭىر» باسەكەلەس ەمەس، بۇل عارىش ايلاقتارى سەرىكتەستەر. سوندىقتان دا ءبىز قازاقستانمەن بىرلەسە عارىش باعدارلامالارىن يگەرىپ، العا جىلجيمىز»، - دەدى ۆ. ماتۆيەنكو.

اۆتور: رۋسلان عابباسوۆ