قانات يسلام: ەگەر گەننادي كەلىسسە، مەن ونىمەن رينگكە شىعامىن
ول «گەننادي گولوۆكينمەن جەكپە-جەككە شىعۋ مۇمكىندىگى بولسا، وعان كەلىسەر مە ەدىڭىز؟» دەگەن سۇراققا:
- گەننادي ەكەۋمىز قازاقستاننان شىققانبىز. ەكەۋمىزدىڭ دە سوققىمىز جاقسى. ول دا توبەلەسۋدەن قورىقپايدى جانە توبەلەسە بىلەدى. ءبىز ءبىر ەلدىڭ نامىسىن قورعاپ جۇرگەندىكتەن ەكى قازاقستاندىقتى ءبىر-بىرىنە قارسى قويۋ كەرەك ەمەس. ال، ەگەر حالىق ەكەۋمىزدىڭ جەكپە-جەككە شىققانىمىزدى قالاسا، مەن رينگكە شىعار ەدىم. ويتكەنى، بۇل - بوكس. گەنناديگە تەك جەڭىس تىلەيمىن. ول ءاردايىم ەلىمىزدىڭ تۋىن كوككە كوتەرىپ، حالقىمىزدىڭ باتىرى اتانا بەرسىن دەپ تىلەيمىن.
سونىمەن قاتار بوكسشى قازاقستاندىقتار الدىندا جاۋاپكەرشىلىكتى سەزىنەتىنىن ايتتى.
- ءار جەكپە-جەگىمدە قازاقستان ەلىنىڭ مەنى قاراپ وتىرعانىن سەزەم. سوندىقتان جاۋاپكەرشىلىكتى ۇعىنا تۇسەم. قازاقستان حالقىنىڭ بىرلىگىن ماقتان تۇتا وتىرىپ، قولداۋىنا العىس بىلدىرەمىن. حالقىمىز سابىرلى بولىپ، ءوسىپ-ونە بەرسىن. قازاقستان جاستارى ۇيدە وتىرماي شەتەل اسسا، ەلىمىزدىڭ كوك تۋىن جەلبىرەتسە، قۇر بوسقا جۇرمەي جۇمىس ىستەسە ەكەن دەيمىن، - دەيدى يسلام جانكۇيەرلەرىنە.
بۇعان دەيىن قانات يسلامنىڭ مەنەدجەرى نەلسون لوپەس ءار ءتۇرلى سالماقتا بولعانىنا قاراماستان قاناتتىڭ گولوۆكينمەن كەزدەسۋگە دايىن ەكەنىن مالىمدەگەن ەدى.
9-مامىر كۇنى قازاقستاندىق بوكسشى كاسىبي رينگتە 21-توبەلەسىن وتكىزىپ، قارسىلاسىن 6-راۋندتا نوكاۋتقا تۇسىرگەن بولاتىن.
