ءار جەكسەنبى سايىن استانانىڭ ورتالىق ساياباعىندا سپورتتىڭ بىرنەشە ءتۇرى بويىنشا تەگىن جاتتىعۋلار وتەدى - فوتو

استانا. قازاقپارات - بۇگىن استانا قالاسىنىڭ ورتالىق ساياباعىندا بۇقارالىق سپورت ماۋسىمى باستالدى.

ەندى ءار جەكسەنبى سايىن اشىق اسپان استىندا سپورتتىڭ بىرنەشە ءتۇرى بويىنشا تەگىن جاتتىعۋلار وتپەك.

استانا قالاسىنىڭ اكىمدىگى، سونىڭ ىشىندە، دەنە شىنىقتىرۋ جانە سپورت باسقارماسى ۇيىمداستىرعان بۇل بۇقارالىق سپورت ماۋسىمى «Fitness Park Astana» دەپ اتالادى. ياعني، ماۋسىم اياسىندا ءار جەكسەنبى سايىن يوگا، زۋمبا، كارديو- زون سياقتى سپورت باعىتتارى بويىنشا جاتتىقتىرۋشىلار ەلوردا تۇرعىندارىن تەگىن جاتتىقتىرىپ، ءار جەكسەنبى سايىن ساعات 10.00-13.00 اراسىندا سەرگەكتىك سىيلايدى.

ال، ماۋسىمنىڭ بۇگىنگى العاشقى جاتتىعۋىنا شامامەن جۇزگە تارتا ادام كەلدى. كۇن رايى اياق استى سۋىتپاعاندا، بالا- شاعامىزدى ەرتىپ كەلەر ەدىك، دەيدى جۇرتشىلىق.

«استانا قالاسىنىڭ اكىمدىگى حالىقتىڭ، اسىرەسە، جاستاردىڭ سپورتپەن شۇعىلدانۋىنا جاعداي جاساپ كەلەدى. بىلتىر توعىز ساياباقتا ۇنەمى ءارتۇرلى سپورتتىق شارالار ۇيىمداستىرىپ تۇردىق. ال، بيىل ورتالىق ساياباقتا، اشىق اسپان استىندا وسىنداي اۋقىمدى شارا ۇيىمداستىردىق. ءار جەكسەنبى سايىن ساياباقتىڭ ءبىر بۇرىشىندا تەگىن فيتنەس جاتتىعۋ وتسە، ەكىنشى ءبىر بۇرىشىندا جاستار يوگامەن جاتتىعۋلارىن جاساي الادى»، - دەدى بۇگىن بۇقارا حالىقپەن بىرگە سپورتپەن شۇعىلدانعان قالالىق اكىمدىكتىڭ دەنە شىنىقتىرۋ جانە سپورت باسقارماسىنىڭ باسشىسى بەرىك مارجىكپايەۆ.

        

 

اۆتور: كەنجەكەي توقتامۇرات قىزى