قازاقستاننىڭ بوكس مەكتەبى بۇكىل ازيانى ورگە سۇيرەي الادى - قازاقستاننان العاشقى الەم چەمپيونى ۆ. راچكوۆ

استانا. قازاقپارات - پاۆلوداردا جاسوسپىرىمدەر اراسىندا بوكستان ازيا چەمپيوناتى ءوتىپ جاتىر. وسى بايراقتى باسەكەگە قاتىسىپ جاتقان جاس قازاقستاندىق بوكسشىلارعا الماتىدا دۇنيەگە كەلىپ، بۇگىندە رەسەيدە تۇرىپ جاتقان قازاقستاننان شىققان ءبىرىنشى الەم چەمپيونى، ك س ر و قۇراماسىنىڭ مۇشەسى ۆالەري راچكوۆ ساتتىلىك تىلەدى.

«مەنىڭ جان- جۇرەگىم قازاقستاننان ەش اجىراعان ەمەس. مەن رەسپۋبليكاداعى وقيعالاردىڭ قالاي ءوربىپ جاتقاندىعىن ءجىتى نازاردا ۇستاپ وتىرامىن»، - دەدى ۆ. راچكوۆ.

وسى رەتتە ول پاۆلوداردا ءوتىپ جاتقان جاسوسپىرىمدەر اراسىنداعى بوكستان ازيا چەمپيوناتىنا وڭ باعاسىن بەرىپ، جاس قازاقستاندىق بوكسشىلارعا ءوز كەڭەسىن دە بەردى.

«بالالار سەنىمدى تۇردە جەڭىسكە قول جەتكىزۋ ءۇشىن ۇرىستىڭ وڭتايلى ءتۇرىن تابۋى ءتيىس. سوققى جاساۋ كەرەك، سوندا جەڭىس سەندە بولادى. كىم كوپ سوققى جۇمساسا، سول جەڭىسكە جەتەدى» ، - دەگەن تانىمال بوكسشى جاس بوكسشىلارعا جەڭىس تىلەدى.

وسى ورايدا ۆ. راچكوۆ قازاقستاندىق بوكس مەكتەبىنىڭ ساپاسى وتە جوعارى ەكەندىگىن باسا اتاپ ءوتتى. ونىڭ پايىمىنشا، سوڭعى بىرنەشە جىل بويى ۇزدىك ناتيجە كورسەتىپ كەلە جاتقان قازاقستان بوكسىنا وليمپيادا ويىندارىندا بۇكىل ازيانى ورگە سۇيرەۋگە بىرەگەي مۇمكىندىك تۋىپ وتىر.

«قازاقستاندا بوكسپەن اينالىساتىنداردىڭ لەگىنىڭ كوپتىگى ءارى وعان زور قىزىعۋشىلىق تانىتۋى، بۇل سپورت ءتۇرىنىڭ دامۋىنا قولداۋ كورسەتۋ دەڭگەيىنىڭ جوعارى بولۋى سەبەپتى قازاقستاندىق بوكس ازيالىق بوكستىڭ كوشباسشىسىنا اينالدى. سوندىقتان دا، قازاقستاننان وليمپيادا چەمپيوندارى بىرنەشە جىل بويى تۇراقتى تۇردە شىعىپ كەلەدى. ولار بۇكىل ازيالىق بوكستى كوتەرۋگە قاۋقارلى»، - دەدى ول.

بۇل رەتتە داڭقتى بوكسشى ازيا بوكس كونفەدەراتسياسىنىڭ پرەزيدەنتى سەرىك قوناقبايەۆتىڭ ەلىمىزدە بوكس مەكتەبىنىڭ قالىپتاسۋىنا، جوعارى دەڭگەيگە كوتەرىلۋىنە زور ۇلەس قوسقاندىعىن ايرىقشا اتاپ ءوتتى.

«بۇگىندە سەرىك كەرىمبەك ۇلىنىڭ قازاق بوكسىن الدىڭعى لەككە شىعارۋعا زور مۇمكىندىگى بار. ونىڭ ءتيىمدى باسشىلىعىنىڭ ارقاسىندا بۇگىنگى قازاقستاندىق بوكس مەكتەبى جيناقتاعان مول تاجىريبە مەن جاستار تارابىنان بۇل سپورتقا قىزىعۋشىلىق قازاقستاننىڭ بۇكىل ازيا ەلدەرىن ىلگەرىلەتۋىنە جول اشادى دەپ ويلايمىن. بۇعان قوسا، قازاقستاندىق بوكسشىلار كوشباسشى بولىپ قانا قويماي، بۇكىل ازيالىق بوكستى سوڭىنان ەرتۋگە مىندەتتى دە»، - دەدى ۆ. راچكوۆ.

ايتا كەتەيىك، ۆالەري راچكوۆ 1956 -جىلى 24 -ساۋىردە الماتى قالاسىندا دۇنيەگە كەلگەن. 12 جاسىنان بوكسپەن اينالىسىپ، «دينامو» سپورت قوعامىنىڭ جەرگىلىكتى سەكتسياسىندا ستانيسلاۆ بولدىريەۆتىڭ قول استىندا جاتتىققان.

ول 1973 -جىلى بۇكىلوداقتىق جاستار ويىنىندا العاشقى جەڭىسىنە قول جەتكىزدى. ال 1976 -جىلى ەكىنشى ورتا سالماقتا بوكستان كسرو چەمپيونى اتاعىن جەڭىپ الدى. سول جىلى مونرەالدا وتكەن جازعى وليمپيادا ويىندارىنا جولى ءتۇسىپ، ەكى قارسىلاسىنان باسىم تۇسكەنىمەن ءۇشىنشى كەزدەسۋىندە مونرەال وليمپياداسىنىڭ چەمپيونى اتانعان يوحەن باحفەلدكە ەسە جىبەرىپ الدى.

ال ودان كەيىنگى ەكى جىل بويى ۆ. راچكوۆ بىردە-ءبىر رەت جەڭىلىستىڭ اشتى ءدامىن تاتپاي ك س ر و بىرىنشىلىگىندە توپ جارىپ ءجۇردى. 1978 -جىلى بەلگرادتا وتكەن الەم چەمپيوناتىنىڭ شيرەك فينالىندا جوعارىدا اتاپ وتكەن ي. باحفەلدپەن جۇدىرىق ءتۇيىستىرىپ، جەڭىسكە جەتكەن ەدى. ول ەڭبەك سىڭىرگەن سپورت شەبەرى، سونىمەن قاتار «داڭقتى بوكسشى» اتاعىنا دا يە بولعان.

سپورتتىڭ مانساپ جولىن اياقتاعاننان كەيىن ۆالەري راچكوۆ 4 جىل بويى الماتىدا بالالار جاتتىقتىرۋشىسى بولىپ جۇمىس ىستەدى. ودان كەيىن ماسكەۋگە قونىس اۋدارىپ، 1984-1987 جىلدارى ارالىعىندا ماسكەۋلىك «دينامو» سپورت قوعامىندا جاس بوكسشىلاردى جاتتىقتىردى. كەيىنىرەك ك س ر و جاسوسپىرىمدەر قۇراماسىنىڭ جاتتىقتىرۋشىسى بولعان. ا ي ب ا- نىڭ حالىقارالىق ساناتتاعى تورەشىسى مارتەبەلى اتاعى بار.

اۆتور: مارلان جيەمباي