ەلباسى ەلدىڭ ءسوزىن سويلەدى
ويتكەنى، ەكىگە جارىلعان قوعام ەلباسى نۇرسۇلتان ءابىش ۇلى نازاربايەۆتىڭ جەر ماسەلەسىنە ايتقان سوڭعى سوزىنەن كەيىن قايتا تۇتاسا بىرىكتى. ەلدىڭ كوپتەن كۇتكەن سەنىمى اقتالىپ، پرەزيدەنت تاۋەلسىزدىگى نەبارى شيرەك عاسىرعا جۋىقتاعان قازاقستاندا حالىق ءۇشىن جۇمىس ىستەيتىن كەپىل ەكەنىن تاعى دا دالەلەدى.
بۇل پىكىردى قازاقپارات تىلشىسىنە قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ رەكتورى دينار نوكەتايەۆا ءبىلدىردى.
«ءبىر نارسەنىڭ باسى اشىق. سوڭعى ۋاقىتتا جەرگە بايلانىستى ورىن العان وقيعالار قازاقستان قوعامىن ساياسي تۇرعىدان وسىرە تۇسكەنى انىق. بۇل ەلىمىزدەگى دەموكراتيالىق جولمەن وركەندەپ كەلە جاتقانىن كورسەتەدى. دەموكراتيانىڭ باستى قۇندىلىعى حالىق پىكىرىمەن ساناسا وتىرىپ، ءادىل شەشىم قابىلداۋ، سول ارقىلى ەل ىشىندەگى تەپە-تەڭدىكتى ساقتاۋ. مەملەكەت باسشىسىنىڭ اقوردادا وتكەن كەڭەستە ۇلكەن رەزونانس تۋدىرعان «جەر تۋرالى» كودەكستىڭ كەيبىر نورمالارىنا ءبىر جىلعا ماراتوري جاريالاۋى كەز كەلگەن بۇكىل حالىقتىق پىكىردى جاقتايتىنىن ايعاقتايدى. قازىردە ەلباسىنىڭ «بىزگە حالىققا ۇنامايتىن زاڭنىڭ قاجەتى جوق» دەگەن ءبىر اۋىز ءسوزىنىڭ ءوزى قوعامدا قىزۋ تالقىعا ءتۇسىپ، قالىڭ جۇرتشىلىق اراسىنان قولداۋ تاۋىپ وتىر»، - دەدى ول.
ونىڭ پايىمىنشا، قانداي دا ءبىر ساياسي كوزقاراستا اسىعىس شەشىم قابىلداۋعا بولمايتىنى سەكىلدى ەكونوميكادا دا توندى كەلىسپەي پىشۋگە بولمايدى. «جەتى رەت ولشەپ بارىپ كەسىلمەگەن» تىرلىك ەرتەڭگى كۇنى سان سوقتىرۋى مۇمكىن. ال قوعام مۇشەلەرىنىڭ ەڭ جاندى تۇسى جەر ماسەلەسىندە جان-جاقتى ويلاستىرماي قيمىل جاساۋ ءتىپتى وتە شەتىن كۇردەلىلىك. ويتكەنى، ەلباسى ايتقانداي، «جەر ەڭ ءبىرىنشى حالىقتىكى».
«قازاق حالقى «جەر بايلىقتىڭ اناسى بولسا، اكەسى ەڭبەك» دەيدى. زاڭدى مۇراگەرى حالىق بولىپ تابىلاتىن مەملەكەتتىڭ مەنشىگىندەگى جەر ەلدىڭ يگىلىگىنە جۇمىس ىستەگەنىن بارلىق ادام ماقۇل كورەدى. ءبىراق، قانداي جولمەن؟ وسىنى الداعى ۋاقىتتا ۇكىمەت حالىقپەن بىرلەسە وتىرىپ پرەزيدەنتتىڭ الدىنا قوياتىن بولادى. بۇل ناعىز الەمدىك پراكتيكاعا ساي جاسالعان قازاقستاننىڭ دەموكراتيالىق قادامى»، - دەدى ۋنيۆەرسيتەت باسشىسى.
سونىمەن قاتار ول حالىقتىڭ ءبىر-ءبىرىن سابىرعا شاقىرىپ، وسى ۋاقىت ىشىندەگى ەڭ باستى بايلىعىمىز تاۋەلسىزدىكتى ساقتاۋ ەكەنىن ۇعىنعانى قاتتى قۋانتقانىن باسا ايتادى.
«بۇل ءبىزدىڭ ەل تۇرعىندارىنىڭ الەمدىك قاقتىعىستاردان بويلارىن اۋلاق سالىپ، ەلدىك ءداستۇر مەن بولاشاقتى ويلايتىندارىن ايشىقتايدى. ويتكەنى، ەگەمەندىكتى قورعاۋ ەلدىڭ دە، ەلباسىنىڭ ەڭ باستى ماقساتى. قۇرىلاتىن كوميسسياعا «حالىقتىق ۇسىنىستارمەن بىرگە «جەر تۋرالى» كودەكستى ەگجەي-تەگجەيلى قاراپ، پارلامەنتپەن بىرگە كەلىسىمگە كەلەتىن بولسا عانا موراتوريدى الۋ» جونىندە تالاپ قويعان نۇرسۇلتان نازاربايەۆتى بارشا قازاقستان ازاماتتارى بىرلىكتىڭ برەندى عانا ەمەس، مەملەكەتتىڭ نەگىزگى كەپىلى رەتىندە جاقسى تۇسىنەدى. سوندىقتان دا سوڭعى ءسوزدى ەلباسىدان كۇتەتىن. كەشە بۇل سەنىم تاعى دا اقتالدى»، - دەدى د. نوكەتايەۆا.
اۆتور: مارلان جيەمباي
