گ. قاراعۇسوۆا: قازاقستاننان جەر الامىن دەپ كەزەكتە تۇرعان شەتەلدىك جوق
بۇل تۋرالى بۇگىن ق ر پارلامەنتى ءماجىلىسىنىڭ دەپۋتاتى گۇلجان قاراعۇسوۆا ءمالىم ەتتى.
«بۇل ماسەلەنىڭ نەگىزگى جاۋابىن قازاقستان حالقى اسسامبلەياسىنىڭ سەسسياسى بارىسىندا مەملەكەت باسشىسى ناقتى تاپسىرما بەرىپ، قازاقستاندا شەتەلدىكتەرگە جەر ساتىلمايتىندىعىن ايتقان بولاتىن. بۇعان قوسا، جەر ساتىپ العىسى كەلىپ كەزەكتە تۇرعان، ءوز تەحنولوگياسىن اكەلۋگە نيەتتى شەتەلدىكتەر جايىندا ەستىپ تە، كورىپ تە وتىرعان جوقپىز»، - دەدى ول ب ا ق وكىلدەرىنىڭ ساۋالىنا وراي.
ونىڭ اتاپ وتۋىنشە، 2013-جىلى ۇكىمەت «ينۆەستيتسيالار تۋرالى» زاڭعا قول قويدى. سونىڭ ناتيجەسىندە ينۆەستورلارعا 10 جىلعا دەيىن بارلىق سالىقتاردان بوساتىلۋ سىندى بىرەگەي مۇمكىنشىلىك بەرىلدى.
«وكىنىشكە وراي، ينۆەستورلاردان ەشكىم دە كەلمەدى. ەندى مىنە شەتەلدىكتەرگە جەر بەرىلەتىن بولىپتى دەۋدە».
گ. قاراعۇسوۆا قازاقستاندا شەتەلدىكتەرگە جەردى جالعا بەرۋ تاجىريبەسى 2003-جىلدان بەرى بار ەكەندىگىن اتاپ ءوتتى. دەگەنمەن، ول ۋاقىتتا جەر جالعا 10 جىلعا بەرىلىپ كەلگەن بولاتىن. الايدا بۇل مەرزىم شەتەلدىك ينۆەستورلاردىڭ جەرگە سالعان ءوز قارجىسىن قايتارىپ الۋعا جانە ازداپ بولسىن پايدا تابۋىنا مۇمكىندىك بەرمەيدى.
«سوندىقتان دا حالىقارالىق تاجىريبەگە سۇيەنە وتىرىپ بۇل مەرزىم ۇزارتىلدى. شىندىعى وسى، وسىلاي دۇرىستاپ تۇسىندىرە الساق، بارلىعى دا تۇسىنەدى. بىزدەرگە مەملەكەتتە جۇرگىزىلىپ جاتقان كەز كەلگەن ماسەلەنى ءتۇسىندىرۋ جۇمىستارىن كۇشەيتۋ قاجەت»، - دەپ اتاپ ءوتتى ول.
اۆتور: مارلان جيەمباي
