الماتىدا دزيۋدو اكادەمياسى اشىلادى

استانا. قازاقپارات - 13- مامىردا الماتى قالاسىندا دزيۋدو اكادەمياسىنىڭ سالتاناتتى تۇردە اشىلۋ ءراسىمى وتەدى، دەپ حابارلادى ق ر دزيۋدو فەدەراتسياسىنىڭ باسپا ءسوز قىزمەتىنەن.

جاڭا اكادەميا بارلىق حالىقارالىق تالاپتارعا ساي بولماق. سپورت كەشەنىندە 4 تاتاميگە ارنالعان زال، ترەناجەر زالى، 100 ادامعا ارنالعان جاتاقحانا مەن اسحانا ورنالاسادى. ونىڭ ىشىندە قازاقستان ۇلتتىق قۇراماسىنىڭ عانا سپورتشىلارى ەمەس، دزيۋدو كۇرەسىنە ەندى قىزىعۋشىلىق تانىتقان جەتكىنشەكتەر دە جاتتىعا الادى. سونىمەن قاتار، اكادەميا اياسىندا حالىقارالىق دارەجەدە وقۋ-جاتتىعۋلار، شەتەلدىك مامانداردىڭ قاتىسۋىمەن سەمينارلار مەن شەبەرلىك ساباقتارىن ۇيىمداستىرۋ كوزدەلگەن.

ەستەرىڭىزگە سالايىق، قۇرىلىستىڭ العاشقى تاسىن قالاۋعا حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر مەن قازاقستان دزيۋدو فەدەراتسياسىنىڭ پرەزيدەنتى كەڭەس راقىشيەۆ قاتىسقان ەدى.

ال اكادەميانىڭ سالتاناتتى تۇردە اشىلۋ راسىمىنە ق ر مادەنيەت جانە سپورت ءمينيسترى ارىستانبەك مۇحامەدي ۇلى، الماتى قالاسىنىڭ اكىمى باۋىرجان بايبەك، حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر مەن قازاقستان دزيۋدو فەدەراتسياسىنىڭ پرەزيدەنتى كەڭەس راقىشەۆتىڭ قاتىسۋى جوسپارلانعان.

اۆتور: مارلان جيەمباي