ەكىباستۇزدا كوپ بالالى انا ءساندى جازعى ەتىكتەر توقىپ، تابىس تابۋدا - فوتو

 پاۆلودار. قازاقپارات - ەكىباستۇزدا بەس بالا تاربيەلەپ وتىرعان گۇلباقىت سانسىزباي قىزى ىڭعايلى ءارى ءساندى جازعى ەتىك توقۋمەن اينالىسىپ، ءناپاقاسىن تاۋىپ وتىر.

«ەتىك تىگۋ ءۇشىن ەپتىلىك پەن شىدامدىلىق كەرەك. بۇل ىسپەن اينالىسۋدى بيىلعى جىلدىڭ كوكتەمىندە باستاعان ەدىم. بۇگىندە تۇرعىندار تاراپىنان تاپسىرىس تولاستار ەمەس. ءتىپتى، ۇلگەرمەي جاتىرمىن.

ءبىر- ەكى كۇننىڭ ىشىندە قوس ەتىكتى تىگىپ شىعۋعا بولادى. قىز- كەلىنشەكتەرگە ارنالعان ەتىك 4500 تەڭگەدەن بولسا، بالالارعا ارنالعان اياق كيىم 2500 تەڭگەدەن ساتىلادى. قاجەت شيكىزاتتى الماتى قالاسىنان تاپسىرىس ارقىلى الامىن. باسىندا جولداسىم بۇل ىسپەن اينالىسۋىما قارسىلىق بىلدىرگەن بولاتىن. الايدا قولدان بۇيىم توقۋ وتباسىنداعى شارۋا مەن بالا تاربيەسىنە ەش كەدەرگى تۋدىرمايتىندىعىنا كوزى جەتكەن سوڭ، قولداۋ تانىتاتىن بولدى. بۇعان قوسا، ۇيدە وتىرىپ جۇمىس جاساۋ ءوندىرىس شىعىستارىن ءبىرشاما قىسقارتىپ، قوسىمشا تابىس تابۋعا مۇمكىندىك بەرەدى»، - دەيدى شەبەر.

 مەكتەپ قابىرعاسىندا ءجۇرىپ توقىمامەن اينالىسا باستاعان گۇلباقىت سانسىزباي قىزى اياق كيىمگە ءتۇرلى ورنەك سالۋدى عالامتور ارقىلى ۇيرەنگەن. ۇيدە وتىرىپ ءوز ءىسىن دوڭگەلەتىپ وتىرعان انا باس كيىمدەر مەن سومكە، ءتۇرلى اشەكەي بۇيىمدار دا جاسايدى. ونىڭ جۇمىستارىنىڭ اراسىنان Adidas لوگوتيپى بار سپورتتىق اياق كيىمدەردى دە كەزدەستىرۋگە بولادى. بولاشاقتا توقىماشى شەبەرلىگىن شىڭداپ، ءوز كاسىبىنىڭ كوكجيەگىن كەڭەيتۋ ارقىلى وتاندىق ەتىكتەر شىعارۋدى كوزدەپ وتىر، دەپ جازادى pavlodarnews.kz.