قانات يسلامنىڭ قارسىلاسى قانشالىقتى مىقتى؟
بۇل قانات باۋىرىمىزدىڭ وسى جىلداعى العاشقى ايقاسى. ول وتكەن جىلى 7- قاراشادا ماياميدە دومينيكاندىق دجوناتان باتيستانى ءبىرىنشى راۋندتا نوكاۋتپەن جەڭىپ، كاسىپقوي رينگتەگى 20-جەڭىسىنە قول جەتكىزگەن بولاتىن.
مىنە، سودان بەرى الاش ۇلاندارى قانات باۋىرىنىڭ ايقاسىن ساعىنىپ جۇرگەنى ايتپاساق تا تۇسىنىكتى. وسى ەكى ارالىقتا وتانداسىمىز ءبىر ەمەس، بىرنەشە كەزدەسۋ وتكىزۋدى جوسپارلاعان بولاتىن. الايدا، بەلگىسىز سەبەپتەرگە بايلانىستى وتپەي قالعانىن دا بوكس سۇيەر قاۋىم جاقسى بىلەدى.
قازىر قانات يسلام 9- مامىر كۇنى وتەتىن جەكپە-جەگىنە تاس-ءتۇيىن دايىن. بۇل كۇنى ەلىمىزدە جەڭىس كۇنىن اتاپ وتەتىن ايتۋلى مەرەكە ەكەنى بەلگىلى. وسى جەڭىس كۇنىنە تۇسپا-تۇس كەلىپ وتىرعان بوكس كەشىندە وتانداسىمىزدىڭ دا كەزەكتى جەڭىسىنە قول جەتكىزۋىنە اللا ءناسىپ ەتكەي دەپ تىلەيمىز.
جارىس بولعان جەردە بىرەۋ ۇتىپ، بىرەۋ ۇتىلاتىنى زاڭدىلىق. سول ءۇشىن بۇگىن قانات باۋىرىمىزدىڭ قارسىلاسى كىم؟ ول قانشالىقتى مىقتى؟ وسى جايىندا وقىرماندارىمىزعا قىسقاشا اقپارات بەرۋدى ءجون ساناپ وتىرمىز.
جەرلەسىمىزدىڭ قارسىلاسى ورتا سالماقتا (69 كەلى) ونەر كورسەتىپ جۇرگەن كولۋمبيالىق بوكسشى - حۋان دە انحەل. ول وسى ۋاقىتقا دەيىن 22 كەزدەسۋ وتكىزگەن. سونىڭ 17 ءىن نوكاۋتپەن ۇتىپ، بىرەۋىندە قارسىلاسىمەن تەڭ دارەجەدە ونەر كورسەتىپتى. ال 3 كەزدەسۋىندە قارسىلاسىنا ەسە جىبەرگەن. بيىل جاسى 28 دە. لاقاپ اتى - لا امەنازا (La Amenaza).
حۋان دە انحەل وسىعان دەيىنگى بارلىق جەڭىسكە جەتكەن جەكپە-جەكتەرىن ءوز وتانىندا وتكىزگەن. ال ءبىر رەت مەكسيكا ەلىندە جۇدىرىقتاسىپ، وندا جولى بولماي قازىرگى كاسىپقوي بوكس جولىنداعى العاشقى جەڭىلىسىنە ۇشىرادى. مىنە، 9- مامىر كۇنى ول ەكىنشى رەت وزگە ەلدە قازاقتىڭ قارادومالاق ۇلى قانات يسلاممەن جۇدىرىقتاسپاق.
ال قانات يسلام وسىعان دەيىنگى 20 كەزدەسۋىنىڭ بارلىعىن قۇرلىقتىڭ ارعى بەتىندە وتكىزىپ كەلەدى. قانداسىمىز ءار ايقاسىن وزگە ەلدە وتكىزسە دە، ءالى بىردە-ءبىر جەڭىلىستىڭ اششى ءدامىن تاتقان ەمەس. انحەل تۇڭعىش رەت سىرت الاڭدا سۇرىنگەنىن ايتىپ وتتىك. بۇل جولى ول قاناتقا قانشالىقتى قارسىلىق تانىتاتىنىن الداعى ساناۋلى كۇندەردەن كەيىن كورەتىن بولامىز.
انحەل ءۇشىن دە 9- مامىر كۇنى وتەتىن ايقاس بيىلعى ماۋسىمداعى العاشقى جەكپە- جەگى بولماق. دەمەك، ەكى بوكسشى دا ۇزاق دەمالىستان كەيىن رينگكە شىققالى وتىر. سوندىقتان دا، ەكەۋى دە رينگتى ساعىنىپ قالعانى انىق. بوكس ءبىز ويلاعاننان دا تارتىستى ءوتۋى بەك مۇمكىن. قوس باتىردىڭ جەكپە-جەك كەشىن ا ق ش- تىڭ «Bounce» ارناسى كورسەتەتىن بولسا، ەلىمىزدە «قازاقستان» ۇلتتىق ارناسى تىكەلەي ەفيردە كورسەتەتىن بولادى.
قانات يسلام قازىرگە دەيىن كاسىبي رينگتە 20 جەكپە-جەك وتكىزىپ، بارلىعىندا جەڭىسكە جەتتى، سونىڭ 17 ءىن نوكاۋتپەن اياقتادى. بوكسشى ءبىرىنشى ورتا سالماقتا (69 كەلى) WBA Fedelatin جانە WBA FideCaribe نۇسقالارى بويىنشا الەم چەمپيونى.
كۇنسۇلتان وتارباي
