يتاليالىق سوت اش ادامدارعا تاماق ۇرلاۋعا رۇقسات بەردى

استانا. قازاقپارات - يتاليانىڭ جوعارعى سوتى اش ادامداردىڭ تاماقتى ۇرلاۋىن قىلمىس دەپ ساناۋدان باس تارتتى. بۇل شەشىم ۋكراينالىق باسپاناسىز جۇرگەن رومان وسترياكوۆتىڭ ىسىنە قاتىستى قابىلداندى.

 ول وسىعان دەيىن ەكى ءتىلىم ىرىمشىك پەن شۇجىقشا ۇرلاعانى ءۇشىن ايىپتالعان بولاتىن، - دەپ حابارلايدى «كوممەرسانت» باسىلىمى جەرگىلىكتى اقپارات قۇرالدارىنا سىلتەمە جاساپ.

وقيعا 2011 - جىلى گەنۋيادا بولعان. وسترياكوۆ دۇكەننەن قالتاسىنا ىرىمشىك پەن شۇجىقشانى سالىپ، تەك نان ءۇشىن اقشا تولەمەك بولدى. مۇنى دۇكەندەگى باسقا ءبىر ساتىپ الۋشى بايقاپ، كۇزەتشىگە حابارلاعان. ۋكراينالىقتى التى ايعا قاماۋ تۋرالى ۇكىم شىعىپ، ول 100 ەۋرو ايىپپۇل تولەۋگە مىندەتتەلگەن ەدى. دەگەنمەن قورعاۋشىلار جاعى ۇكىمگە شاعىم ءتۇسىردى.

«وسترياكوۆتىڭ ءىسى» يتاليادا ءۇش سوت كەزەڭى بويىنشا قارالدى. جوعارعى كاسساتسيالىق سوت ءىستى قاراپ، ەر ادامنىڭ بۇل ۇرلىققا «تاماقتانۋعا قاجەتتىلىكتەن» بارعانىن مويىندادى.

Kaz.tengrinews.kz