اقەركە تاجىبايەۆا: سۇيىكتىم ايتقان سوڭ ءبىر كۇندە جۇمىستان شىقتىم
مۇنىمەن قاتار، ءوزىن تەك قايرات نۇرتاستىڭ بولەسى دەپ بىلەتىندەرگە رەنىشىن جەتكىزدى.
28 -ءساۋىر كۇنى ۇزاتىلعان بويجەتكەننىڭ ۇلكەن تويى مامىردىڭ 8 -جۇلدىزىنا جوسپارلانعان. اتالعان قۋانىشتى جىگىتتىڭ اتا- اناسى تۋىپ- وسكەن اقتوبە قالاسىندا وتكىزبەك.
- اقەركە بولاشاق جارىڭىزبەن امەريكادا تانىسقاندارىڭىز راس پا؟ ول كىسىنىڭ ونەرگە قاتىسى بار ما؟
- مۇنداي اقپاراتتىڭ تارالعانى راس. الايدا امەريكادا ەمەس، انگليادا تانىستىق. ول كىسى اتالعان مەملەكەتتە بولاشاق باعدارلاماسىمەن ءبىلىم الىپ جاتقان بولاتىن. ءوزى - زاڭگەر. اعىلشىن، تۇرىك تىلدەرىن جەتىك مەڭگەرىپ، جاپونيادا تاجىريبە جيناپ قايتقان. ءبىزدى بايلانىستىراتىن وسى حالىقارالىق دەڭگەي سياقتى. ويتكەنى مەن ءوز سالامدا، ول كىسى ءوز سالاسىندا ءجۇرىپ ەل مەن جەر كوردى. ءتۇرلى ەلدىڭ مادەنيەتىمەن تانىستى. باعدارلاما بويىنشا جولدامانى دا ءوزى كۇشىمەن ۇتىپ الدى.
تازا ەڭبەگىمەن جۇمىسقا تۇرىپ، اناسى مەن وتباسىن اسىراپ كەلەدى. تولىق اتى- ءجونىن قۇپيا قالدىرعىم كەلىپ وتىر. قايرات نۇرتاس وتباسىن جاسىرادى، اقەركە دە بولەسىنە ەلىكتەپ ءجۇر دەپ سوكپەڭىزدەر. مەنىڭشە، ءاربىر قىز بالاسىنىڭ، ونەر ادامىنىڭ جەكە ءومىرى بولۋى ءتيىس. مۇنىمەن قاتار، سۇيىكتىم دە وزىنە جارناما جاساپ، ىشتەگى دۇنيەنى سىرتقا جايعاندى ۇناتپايدى. ماعان ءدال وسىنداي ءوتىنىش ايتقان بولاتىن.
- ەكەۋىڭىز دە شەتەلگە ءجيى شىعاسىزدار. ال رومانتيكالىق ۇسىنىستى قايدا جاسادى؟
- ءبىزدىڭ قارىم- قاتىناسىمىز تەلەفون ارقىلى جۇزەگە اسىپ، اندا-ساندا ەلگە كەلىپ-كەتىپ ءجۇردى. ءوزىم ونەردە ءجۇرىپ، اتا-اناممەن بىرگە تۇرعاندىقتان، كوپ كورىسە المادىق. ەكەۋىمىز دە وقىعان ازامات بولعان سوڭ، ءبىر- ءبىرىمىزدى تانۋ جەڭىل بولدى. ءبىر كورگەننەن- اق ءسوزسىز ءتۇسىنىسىپ، وتباسىلارىمىزبەن ارالاسىپ كەتتىك. ءبىراق مەن بولاشاق جارىمنىڭ وتباسىن وزىمە قۇدا تۇسۋگە كەلگەن كەزدە عانا كوردىم. ەنەممەن سول مەزەتتە عانا تانىستىم.
رومانتيكالىق ۇسىنىستى قازاقستان قوناق ءۇيىنىڭ 25 -قاباتىندا ورنالاسقان مەيرامحانادا جاسادى. ول جەردەن الماتى الاقانداعىداي كورىنەدى. ءدال سونداي ادەمى كورىنىستىڭ الدىندا تۇرىپ ماعان جۇزىگىن ۇسىندى. ۇسىنىس ءبىراز ۋاقىت بۇرىن جاسالعان بولاتىن. مەن كوز تيمەسىن دەپ جاسىرىپ ءجۇردىم. جاقىندا عانا سىرعا سالىنىپ، ۇزاتۋ تويى ءوتتى. ەندى مىنە ۇلكەن تويعا قىزۋ دايىندىق ءجۇرىپ جاتىر. بارلىعى ءوز رەتىمەن كەلە جاتىر.
- وڭتۇستىكتىڭ قىزى باتىستا كەلىندىك مىندەتتەرىن قالاي اتقارىپ ءجۇر؟ ءۇي شارۋاسىندا قينالعان جوقسىز با؟
- حالىق ونەر ادامدارىنىڭ ءۇي شارۋاسىنا يكەمى جوق، قولدارىنان تۇك كەلمەيدى دەپ ويلايدى. بۇل ءجاي عانا قالىپتاسىپ قالعان جالعان پىكىر سەكىلدى. كەلگەلى تاڭەرتەڭ تۇرىپ، شاي بەرىپ، سالەم سالىپ ءجۇرمىن. ىشتەي ەش وكىنىشىم جوق. قايىن جۇرتىم دا وتە جاقسى. باستاپقىدا داستۇرلەرىمىز بەن سويلەۋ مانەرىمىزدە وزگەشىلىكتەر بار دەپ قورىققانىم راس. قانشا قورىقسام دا، وڭتۇستىكتىڭ قىزىمىن عوي. ءدال ءقازىر كەلىن بولىپ جۇرگەن العاشقى كۇندەرىم دەگەندەي. مەنىڭ ويىمنان شىعىپ، مەن دە ولارعا ۇناپ جاتقان سياقتىمىن. (كۇلدى). ىستىق لەبىزبەن قابىلداپ جاتىر.
- الداعى ۋاقىتتا دا اقتوبە قالاسىندا تۇراقتايسىزدار ما؟
- جوق. وسى جەردە ءبىر اپتاداي ۋاقىت بولىپ، توي وتكەن سوڭ استاناعا بارامىز. جولداسىمنىڭ وتباسى دا، جۇمىسى دا سول جاقتا. مەن دە ەلىمىزدىڭ باس قالاسىنان سالاما سايكەس جۇمىس تاۋىپ، جاقسى وتباسى بولامىز دەگەن نيەتتەمىن. اللا جازسا توي الدىندا ەكىنشى قۇدالىق وتەدى. الىستان ات تەرلەتىپ، اتا- انام كەلەدى.
- حالىق ءسىزدىڭ ءجيى كورىنە بەرمەيتىنىڭىزدى ايتادى. وتباسىن قۇرعان سوڭ ساحنادان مۇلدەم الىستاپ كەتپەيسىز بە؟
- مەن ءداستۇرلى ونەردىڭ ناسيحاتتاۋشىسى بولعاندىقتان، تەلەديدارعا شىعىپ، بەينەباياندارىمدى روتاتسيالاۋدى ماقسات تۇتپايمىن. جالپى قوبىزىمدى ەشۋاقىتتا تاستاعان ەمەسپىن. كونسەرۆاتوريادا ستۋدەنتتەرىم بار. احمەت جۇبانوۆ اتىنداعى مەكتەپتى بىتىرگەلى قۇرمانعازى اتىنداعى قازاق ۇلتتىق مەملەكەتتىك كونسەرۆاتوريادا ءدارىس بەرىپ كەلەمىن. توي الدىندا بۇل جۇمىستان شىقتىم. ءداستۇرلى قازاق ونەرىن تىڭدايتىن قازاقستاندىقتار مەنىڭ قاي جەردە جۇرەتىنىمدى جاقسى بىلەدى.
جىل سايىن بىرنەشە ەلدە وتەتىن فەستيۆالدەرگە قاتىسامىن. بيىل ءبىر اپتاداي ۋاقىت امەريكادا بولدىم. تۇركى الەمىنىڭ مۋزىكاشىلارىنا جول سالعان ۇلكەن كونتسەرتتىك شاراعا اتسالىستىم. 35 ەل مۋزىكاشىلارىنىڭ باسىن قوسىپ، ۇلكەن وركەستر ۇيىمداستىرىپ، ولارعا نوتالاردى جىبەرىپ، ءبىر- بىرىمەن ونلاين ارالاسۋعا جاعداي جاسادىم. ءارتۇرلى ەلدى قامتىعان كونتسەرتتىك باعدارلامانى ۇيىمداستىرۋ كەز كەلگەن ادامنىڭ قولىنان كەلە بەرمەيدى. ودان باسقا الەمدەگى كوپتەگەن ءىس- شاراعا قاتىسامىن. قازاقستاندىقتاردىڭ مەنى كوپ كورە بەرمەۋىنىڭ سەبەبى دە سول بولار.
- سۇيىكتىڭىز ونەردە جۇرۋىڭىزگە قارسى ەمەس پە؟
- كەرىسىنشە، ءداستۇرلى ونەردى ناسيحاتتاعانىمدى قالايدى. مەنىڭ ەكىنشى ماماندىعىم حالىقارالىق قاتىناستار بولاتىن. الماتى قالاسى اكىمدىگى تۋريزم باسقارماسىندا قىزمەت ىستەدىم. جولداسىم مەنىڭ باستى ماقساتىمنىڭ ءداستۇرلى مۋزىكانى ناسيحاتتاپ، ونى كەلەسى ۇرپاققا تاراتۋ ەكەنىن ايتتى. وسىلايشا، سۇيىكتىمنىڭ سوزىنەن كەيىن ءبىر تۇندە ويلانىپ، ەرتەسىندە جۇمىستان كەتۋ تۋرالى شەشىم قابىلدادىم. تامىز ايىندا اكىمدىكتەن كەتتىم. جۇمىستان شىعۋ تۋرالى ارىزىمدى كورگەن كەزدە بارلىعى تاڭقالدى. بۇل شەشىمىم ءۇشىن وكىنبەيمىن. ءومىردىڭ ءبىر سىناعى عوي. تۋريزم باسقارماسىندا ءجۇرىپ ءوزىم بىلمەيتىن دۇنيەلەردى ۇيرەندىم، تالاي جاڭالىقتىڭ كۋاسى بولدىم.
- سوڭعى كەزدە تويىڭىزدى قايرات نۇرتاس جاساپ بەرگەنى ايتىلىپ ءجۇر. بۇل قانشالىقتى راس؟
- مەنى رەنجىتەتىن وسى جايت. تويىم تۋرالى اقپاراتتى قايرات نۇرتاستىڭ بولەسى، قارىنداسى، اپكەسى دەپ تاراتقاندارىنا رەنجۋلىمىن. ونەرگە قايراتتان بۇرىن قادام باسقانمىن. ودان جاسىم دا ۇلكەن. قايرات ەسترادا ونەرىن ناسيحاتتاسا، مەن ءداستۇرلى ونەردى ناسيحاتتايمىن. ارينە، ەكەۋىمىزدىڭ ارا- قاتىناسىمىز وتە جاقسى. گۇلزيرا اپكەمدى دە تۋعان انامداي كورىپ، سىرىممەن بولىسەمىن. تويىمدى ءوز كۇشىممەن جاسادىم. ستسەنارييدى، بەزەندىرەتىن گۇلدەردى، ءمازىردى - بارلىعىن ءوزىم ويلاستىرىپ، ءوزىم تاڭدادىم. امەريكاعا كەتەردىڭ الدىندا بارلىعىن رەتكە كەلتىرىپ ءبىراق كەتتىم.
حالىق جانىمدا ءجۇرىپ، كوزبەن كورمەگەن سوڭ ولاي ايتپاسا ەكەن دەيمىن. تويدى جاساپ بەردى دەگەنگە قوسا قايرات نۇرتاستى تويىنا اقشا بەرىپ شاقىرىپتى دەگەن سىندى مادەنيەتسىز سوزدەر ەستىپ جاتىرمىن. مۇنىڭ بارلىعى جۇرەگىمە قاتتى تيەدى. ويتكەنى كۇندە تاڭەرتەڭ تۇرىپ، ينستاگرامىمدى ءبىر وقىپ شىعامىن. كىم نە دەسە دە، شىندىق ءبىر اللاعا ايان عوي.
- ءسىز ءداستۇرلى ونەردىڭ ناسيحاتتاۋشىسىز. ۇنەمى ءوزىڭىزدى قازاقتىڭ ۇلتتىق كيىمىندە كورەمىز. ءبىراق ءوز تويىڭىزدا باسقا ستيلدەگى كويلەك كيۋىڭىزدىڭ سەبەبى نەدە؟
- مەن قانداي فەستيۆال، كونتسەرت بولسىن، ۇلتتىق كيىم كيىپ جۇرگەن قىزداردىڭ ءبىرىمىن عوي. بۇل توي ومىرىمدە ءبىر- اق رەت بولاتىندىقتان، ەرەكشەلەۋ وتكەنىن قالادىم. نازىك شابدالى رەڭىندەگى كويلەكتى تاڭدادىم. اتالعان كويلەكتىڭ ەسكيزىن ءوزىم سىزىپ، "ارۋناز" اتەلەسىنە تىكتىردىم. سول جەردەگى ءمادينا سىڭىلىمە العىس ايتقىم كەلەدى. كوپ قىز ساتىپ العىسى كەلىپ ءجۇر. ولارعا دا ۇناعانىنا قۋانىشتىمىن. جارتى ماتاسى يتاليادان اكەلىنگەن كويلەكتىڭ باعاسىن ايتىپ جاتقانىم ماعان ۇيات بولار. ونى جاسىرىپ قالايىن.
جاقىن كۇندەردىڭ بىرىندە وتباسىلىق ومىرگە قادام باسقالى وتىرعان بويجەتكەن جولداسىمەن بىرگە استانا قالاسىندا تۇرماق. اتالعان قالادا ج و و- دا ءدارىس بەرىپ، شاكىرت تاربيەلەمەك نيەتتە. مۇنىمەن قاتار، 8 -مامىرعا جوسپارلانعان تويىنىڭ سۋرەتتەرىمەن بولىسۋگە ۋادە بەردى.
