قازاقستاندا جەردى ءتيىمدى پايدالانۋعا قاتىستى باقىلاۋ كۇشەيدى

استانا. قازاقپارات - قازاقستاندا جەردىڭ ءتيىمدى ءارى ماقساتتى پايدالانۋىنا قاتىستى مەملەكەتتىك باقىلاۋ كۇشەيدى. بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا «اگروحيميالىق قىزمەتتىڭ رەسپۋبليكالىق عىلىمي- ادىستەمەلىك ورتالىعى» م م جەتەكشىسى ەربولات بازىلجانوۆ ءمالىم ەتتى.

«قازىرگى ۋاقىتتا قازاقستان جەردى ماقساتىمەن پايدالانۋ ءۇشىن مەملەكەتتىك باقىلاۋدى كۇشەيتتى. وتە جۇيەلى جۇمىستار تىندىرىلۋدا. ەگىس تانابىن اگروحيميالىق زەرتتەۋ - مول ءونىمنىڭ كەپىلى، سول سەبەپتى اگروحيميالىق زەرتتەۋلەردىڭ كولەمى 1,5 ميلليون گەكتاردان 3,5 ميلليون گەكتارعا ۇلعايتىلدى» ، - دەيدى ە. بازىلجانوۆ.

ونىڭ اتاپ وتكەنىندەي، وسى جۇمىستارمەن بۇرىننان اينالاسىپ كەلە جاتقان، جوعارى ءبىلىمدى ماماندارى بار، اگروحيميالىق قىزمەت قاجەتتى قۇرال- جابدىقتارمەن تولىق قامتاماسىز ەتىلگەن.

ونىڭ سوزىنە قاراعاندا، سۋارمالى ەگىستىك جەرلەرگە اگروحيميالىق زەرتتەۋلەر جۇرگىزىپ، توپىراقتاعى اۋىلشارۋاشىلىق داقىلدارىنىڭ ءوسىپ- جەتىلۋىنە ەڭ قاجەتتى ەلەمەنتتەردىڭ مولشەرىن انىقتاپ، ءار تاناپتىڭ پاسپورتىن جاساۋ - جوعارعى ءونىم الۋ مۇمكىندىگىن ۇلعايتىپ، جەر قۇنارلىلىعىنىڭ كەمۋىنە جول بەرمەيدى. وندىرىلگەن ءونىمنىڭ ونىمدىلىگىن جانە ساپاسىن كوتەرۋدە توپىراقتىڭ قۇنارلىعىن ارتتىرىپ، مينەرالدى تىڭايتقىش بەرۋدىڭ جۇيەلەرىن جەتىلدىرۋدىڭ ماڭىزى زور. بۇل ءۇشىن ءاربىر شارۋاشىلىق اۋىسپالى ەگىستىكتەگى داقىلداردىڭ كەزەكتەسۋ ءتارتىبىن ساقتاپ، داقىلدار ەگىلەتىن تاناپ توپىراعىنىڭ مەحانيكالىق، حيميالىق قۇرامىن جەتە ءبىلىپ، سول تابيعي قۇنارلىلىقتىڭ مولشەرىنە قاراي مينەرالدى تىڭايتقىشتاردى بەرۋلەرى قاجەت. سوندىقتان ەگىس ەگەتىن ءاربىر شارۋاشىلىق وزدەرىنىڭ ەگىستىك جەرلەرىنە اگروحيميالىق زەرتتەۋلەر جۇرگىزىپ، ءار تاناپتىڭ پاسپورتىن جاساتۋلارى قاجەت. وسىنداي زەرتتەۋ ناتيجەلەرىن باسشىلىققا العان ۇجىمدار جاقسى كورسەتكىشتەرگە قول جەتكىزەدى.

ماماننىڭ ايتۋىنشا، سۋارمالى ەگىستىك القاپتاردا زەرتتەۋ ءاربىر 5  جىل، ال سۋارىلمايتىن اۋماقتاردا ءاربىر 7  جىل سايىن جۇرگىزىلەتىن بولادى.

 «الەمدىك تاجىريبە بار. گۋمۋس ۇدەرىسى وتە ۇزاق جۇرەتىن قۇبىلىس. سوندىقتان 5-7  جىلدا توپىراق قۇرامىندا بولاتىن گۋمۋستىڭ كولەمى قاتتى ازايىپ كەتپەيدى. بۇل ماسەلە كاسىبي ماماندارعا بەلگىلى. ەگەر قاجەتتىلىك بولسا، بىزدە ودان دا ءجيى تەكسەرىس جاساۋعا ماتەريالدىق مۇمكىندىكتەر جەتەدى. جەر كودەكسىندە دە كورسەتىلگەن، ەگەر جەرگىلىكتى ورگاندار قايسىبىر جەر اۋماعىن جيىرەك تەكسەرىس جاساتۋ كەرەك دەپ شەشسە، ول القاپتاردا اگروحيميالىق تەكسەرىستەر جيىرەك جاسالىپ تۇرادى. بۇل شەشىلەتىن ماسەلە. ەگەر شارۋالاردىڭ وزدەرى جىل سايىن جاساپ تۇرامىز دەسە دە، ءوز ەرىكتەرى، ءبىز تەك كەلىسەمىز. قازىرگى ۋاقىتتا ەلىمىزدە تەكسەرىس جاسايتىن 24 ۇيىم بار. ءبىراق جەر قۇنارىن ءجيى تەكسەرىپ تۇرۋ، مەنىڭشە، بوس شىعىن. 5-7  جىل سايىن جۇرگىزىپ تۇرسا دا جەتكىلىكتى» ، - دەپ اتاپ ءوتتى ول.

  اۆتور: جاسۇلان جولدىبايەۆ