شىمكەنتتىك ستۋدەنتتىڭ ەسكى كۇيتاباقتاردان جاساعان ساعاتتارىنا سۇرانىس كوپ

استانا. قازاقپارات - 18 جاستاعى جىگىت ۆينيل پلاستينكالاردان ءساندى ساعات جاساپ، اجەپتەۋىر پايدا تاۋىپ ءجۇر، دەپ جازادى ك ت ك.

اۆتومەحانيك ماماندىعىن وقيتىن جىگىت ساباقتان قولى قالت ەتكەندە پلاستينكالارمەن الىسىپ اۋرە. ەرەكشە ديزاينمەن ويۋلاپ، ءساندى ساعات جاسايتىن ول ەڭ قيىنى يدەيا تابۋ دەيدى. بۇل ەرمەگىمەن بىلتىردان بەرى اينالىسادى. گاراجدى جيناپ جاتقاندا اكەسىنىڭ ەسكى كۇيتاباقتارىن كورگەن. قوقىسقا تاستاۋعا قيماعان ەۆگەني اۋەلى قيىپ كورە باستايدى. سودان بەرى 100 شاقتى ساعات جاساپ شىعارعان. كوپشىلىگىن تۋىستارى مەن دوستارىنا سىيعا تارتىپتى. ال كەيبىرى ارنايى تاپسىرىسپەن جاسالىپ ساتىلادى. ساعاتتىڭ دا ناقتى قۇنى جوق. مىڭ تەڭگە مەن 10 مىڭ ارالىعىندا دەيدى ءوزى. ازىرشە جۇمىس كوپ. اكەدەن مۇراعا قالعان 250 دانا كۇيتاباق بار ەكەن.