تورەگەلدى شارمانوۆ: جەر - اماناتقا العان بايلىعىمىز
«جەر تۋرالى» زاڭعا ەنگىزىلگەن سوڭعى وزگەرىستەرگە سايكەس، ۇستىمىزدەگى جىلدىڭ شىلدەسىنەن باستاپ ەلىمىزدەگى اۋىل شارۋاشىلىعىنا پايدالانىلاتىن جەردى ءوز ەلىمىزدىڭ ازاماتتارى ساتىپ الۋىنا نەمەسە بۇرىنعىسىنشا جالعا الىپ، يەلىك ەتۋىنە بولادى، دەگەن اكادەميك تورەگەلدى شارمانوۆتىڭ پىكىرىن «ەگەمەن قازاقستان» باسىلىمى جاريا ەتتى. اكادەميكتىڭ پىكىرىن وقىرمان نازارىنا ۇسىنامىز.
جۋىردا وتكەن قازاقستان حالقى اسسامبلەياسىنىڭ سەسسياسىندا جەر ماسەلەسى تۋرالى ەلباسىنىڭ بەرگەن تۇسىندىرمەسىندە: «شەتەلدىك ازاماتتارعا جەر ساتىلمايدى، ولارعا تەك جالعا بەرىلەدى، جالعا بەرۋ مەرزىمى عانا ۇزارتىلعان. بۇرىن بۇل مەرزىم 10 جىل بولاتىن، بۇل مەرزىم ىشىندە سالىنعان قارجىنىڭ قايتارىمى بولمايتىندىقتان، ۇزارتىلىپ وتىر. مىسالى، قاسىمىزداعى رەسەي مەن ەۋروپادا بۇل مەرزىم 50 جىلعا جۋىق» ، - دەدى.
جەر - بارشا حالىققا تيەسىلى، اتا- بابالارىمىز امانات ەتكەن باستى بايلىعىمىز. تاۋەلسىزدىك تاڭىمەن شەكارامىز ايقىندالىپ، شەگەلەنگەن، ءار ەل ءوز شەكاراسىنىڭ اياسىنداعى جەرگە عانا يەلىك ەتە الادى. سوندىقتان، قازىرگى قوعامدا بولىپ جاتقان «جەر شەتەلدىكتەرگە ساتىلادى ەكەن» دەگەن پىكىر نەگىزسىز.
ال جەردى جالعا بەرۋ جايىندا ايتساق، بۇل بارلىق ەلدەردە قولدانىلاتىن جاعداي، الەمدىك ينتەگراتسيادان تىس بولىپ، وقشاۋ ءومىر ءسۇرۋ مۇمكىن ەمەس، ولاي بولسا، ەكونوميكامىزدىڭ دامۋى كەشەۋىل قالماق.
قازىر «جەر تۋرالى» زاڭعا ەنگىزىلىپ وتىرعان وزگەرىستەردىڭ باستى ماقساتى - اۋىل شارۋاشىلىعىنا ارنالعان بوس جاتقان جەردى ءتيىمدى، ۇتىمدى پايدالانۋ، وسىنى دۇرىس ۇعىنعانىمىز ءجون. بۇل - حالىقتىڭ جاعدايىن جاقسارتۋ، تىرشىلىگىن كوركەيتۋ باعىتىندا جاسالىپ جاتقان شارالاردىڭ ءبىرى.
قوعامدا ورىن العان كەرەعار پىكىرلەر ماسەلەنىڭ ءمانىن دۇرىس تۇسىنبەۋدىڭ سالدارىنان تۋىنداپ وتىر، بوس داۋرىعۋ قوعامىمىزدىڭ شىرقىن بۇزىپ، بىرلىك- بەرەكەمىزگە نۇقسان كەلتىرۋى مۇمكىن، سوندىقتان، قازىرگى تاڭدا «جەر تۋرالى» زاڭعا وزگەرىستەر جونىندەگى ماسەلە بويىنشا حالىققا ەگجەي- تەگ- جەيلى، ناقتى اقپارات بەرۋ ماقساتىندا قوعامدا اعارتۋ ناۋقانى جۇرگىزىلۋى ءتيىس دەگەن ويدامىن.
