دانيالىق كاسىپكەرلەر الماتى وبلىسىندا ءسۇت ونىمدەرىن وندىرۋگە قىزىعۋشىلىق تانىتتى

الماتى. قازاقپارات - بۇگىن الماتى اكىمدىگىندە دانيا كورولدىگىنىڭ رەسەي فەدەراتسياسى جانە قازاقستانداعى ەلشىسى توماس ۆينكلەر باستاعان بيزنەس-دەلەگاتسيامەن كەزدەسۋ ءوتتى.

كەزدەسۋ بارىسىندا قوناقتار الماتى مەن دانيا كورولدىگى اراسىنداعى ىنتىماقتاستىقتىڭ قارقىندى تۇردە دامىپ جاتقاندىعىن اتاپ ءوتتى. ايتا كەتەلىك، بۇگىنگى تاڭدا الماتىدا دات كاپيتالى قاتىسقان 24 كاسىپورىن تىركەلگەن.

كەزدەسۋ بارىسىندا توماس ۆينكلەر الماتىنىڭ ينۆەستيتسيالىق تارتىمدىلىعى جاعىنان الەۋەتى وتە جوعارى ەكەندىگىن ايتتى.

«الماتى ەكونوميكالىق جانە يندۋستريالدى-يننوۆاتسيالىق دامۋ جاعىنان جوعارى كورسەتكىشتەرگە قول جەتكىزدى. قالادا قازىرگى تاڭدا كوپتەگەن بيزنەس الاڭدار جۇمىس ىستەيدى. ولار وتاندىق جانە شەت ەلدىك كاپيتالدىڭ قاتىسۋىمەن جاڭا كاسىپورىندار قۇرۋعا مۇمكىندىك بەرەدى»، - دەدى دانيا كورولدىگىنىڭ ەلشىسى.

الماتى قالاسى اكىمى باسپا ءسوز قىزمەتىنىڭ مالىمدەگەنىندەي، دانيالىق تاراپ الماتىداعى ينۆەستيتسيالىق ساياساتىن ودان ءارى جالعاستىرماق نيەتتە. قوناقتار اۋىل شارۋاشىلىعىنىڭ، ەنەرگەتيكا جانە جوعارى تەحنولوگيالاردى دامىتۋعا ءوز ۇلەستەرىن قوسۋعا مۇددەلى بولىپ وتىر.

مىسالى، دانيالىق بيزنەس- دەلەگاتسيا الماتى وبلىسىندا شوشقا ءوسىرۋ شارۋاشىلىعى، ءسۇت ونىمدەرى ءوندىرىسى جانە بالىق شيكىزاتىن قايتا وڭدەۋ سالاسىنا ينۆەستيتسيا جۇمساۋعا ەرەكشە قىزىعۋشىلىق تانىتتى.

اۆتور: ايبوتا جاپپاربەرگەن