لاڭكەستەردەن قاۋىپتەنگەن پاكياو جانۇياسىنىڭ كۇزەتىن كۇشەيتتى

استانا. قازاقپارات - سەگىز سالماق دارەجەسىندەگى بوكستان بۇرىنعى الەم چەمپيونى مەنني پاكياو لاڭكەستەردەن سەسكەنىپ، جانۇياسىنىڭ كۇزەتىن كۇشەيتتى.

بۇل تۋرالى 28- ساۋىردە بوكسشىنىڭ ءوزى حابارلادى، دەپ جازدى Lenta.ru Times LIVE- كە سىلتەمە جاساپ.

فيليپپين پرەزيدەنتى بەنيگنو اكينو «ابۋ-ساياف» توبىنىڭ لاڭكەستەرى مەنني پاكياو نەمەسە ونىڭ بالالارىنىڭ ءبىرىن ۇرلاماق بولعانىن ءمالىم ەتتى.

«پرەزيدەنتتىڭ مالىمدەمەسىن ەستىگەن سوڭ مازام كەتتى. فيليپپيندەردىڭ بارلىعىن دوسىم دەپ ەسەپتەگەندىكتەن، تاڭدانىپ وتىرمىن. بارلىعىنا، اسىرەسە، مۇسىلماندارعا دەگەن قارىم-قاتىناسىم جاقسى. وسى حابارلامادان سوڭ جانۇيامنىڭ كۇزەتىن كۇشەيتتىم»، - دەدى پاكياو.

10- ساۋىردە پاكياو سپورتتىق جولىنداعى سوڭعى جەكپە-جەگىندە امەريكالىق تيموتي برەدليدى ءسۇرىندىردى.

37 جاستاعى بوكسشى 58 رەت جەڭىسكە جەتىپ (38 نوكاۋتپەن)، التى رەت جەڭىلدى جانە ەكى رەت قارسىلاسىمەن تەڭ ءتۇستى.

قازىر پاكياو فيليپپين سەناتىنا كانديداتۋراسىن ۇسىنعان، سايلاۋ مامىر ايىندا وتەدى.