ف. حادجيەۆا اتا-اجەسىنىڭ اماناتىن ورىنداپ، قيىن كەزەڭدە پانا بولعان ن. نازاربايەۆتىڭ وتباسىنا العىس ايتتى
بۇگىن استاناداعى بەيبىتشىلىك جانە كەلىسىم سارايىندا ق ر پرەزيدەنتى نۇرسۇلتان نازاربايەۆتىڭ توراعالىعىمەن وتكەن قازاقستان حالقى اسسامبلەياسىنىڭ «تاۋەلسىزدىك. كەلىسىم. بولاشاعى ءبىرتۇتاس ۇلت» كۇن تارتىبىمەن وتكەن XXIV سەسسياسىندا قازاق ۇلتتىق اۋىل شارۋاشىلىعى ۋنيۆەرسيتەتىنىڭ 3-كۋرس ستۋدەنتى فاريزات حادجيەۆا وسىلاي دەدى.
«اسا مارتەبەلى نۇرسۇلتان ءابىش ۇلى! بيىل جاريالانعان العىس ايتۋ كۇنى قانشا تاريحتى ەسكە ءتۇسىرىپ، مەن سياقتى جاستاردىڭ جۇرەگىنە وي سالدى. مەن بۇگىن بۇل ساحناعا وتباسىمنىڭ اماناتىن وتەۋ ءۇشىن شىعىپ تۇرمىن. جەر اۋدارۋ جىلدارىندا مەنىڭ اتامنىڭ وتباسىن قايىرىمدى، قوناقجاي قازاق وتباسى پانالاتىپتى. ولاردىڭ ءوزى ەكى بولمەلى سامان ۇيدە تۇرادى ەكەن. نۇرسۇلتان ءابىش ۇلى، مەن فاريزات حادجيەۆا ءسىزدىڭ وتباسىڭىز، ءابىش اتانىڭ وتباسى پانالاتقان حىزىر حادجيەۆتىڭ نەمەرەسى، حارەت حادجيەۆتىڭ شوبەرەسىمىن»، - دەدى ول.
وسى رەتتە ق ر پرەزيدەنتى فاريزاتتىڭ اتاسىن ەسكە ءتۇسىرىپ، اق نيەتىنە ريزاشىلىعىن ءبىلدىردى.
«نۇرسۇلتان ءابىش ۇلى، ەگەر ءابىش اتانىڭ قامقورلىعى بولماسا، مەندە بۇگىن وسى ساحنادا تۇرماس ەدىم. سول ادامگەرشىلىك، سول كەڭپەيىلدىك، سول قامقورلىق ءۇشىن ءسىزدىڭ اتا-بابالارىڭىزعا، ءسىزدىڭ وتباسىڭىزعا ايتار العىسىمىز، اق تىلەگىمىز شەكسىز»، - ف. حادجيەۆا.
ول ءابىش اتانىڭ باستاماسىمەن ءوز اتاسىنىڭ 2 بولمەلى سامان ءۇي تۇرعىزعانىن دا ايتتى.
«بۇل سول ۋاقىتتا ارنايى جەر اۋدارىلعاندار ءۇشىن ناعىز سالتاناتتى ساراي بولاتىن. قونىس تويىنا ءابىش اتا بۇزاۋ سىيلاپتى. ءدال سول سىيلىق ءبىزدىڭ وتباسىمىزدىڭ باقىت پەن مولشىلىق نىشانىن اينالعان جانە بۇل تاريح بىزدە ۇرپاقتان-ۇرپاققا مۇرا بولىپ كەلەدى. نۇرسۇلتان ءابىش ۇلى، بولگار حالقىندا بارلىق مۇسىلماندار ءۇشىن قاسيەتتى جەر مەككە مەن مەدينا دەگەن ءسوز بار. ال جەر اۋدارىلعاندار ءۇشىن قاسيەتتى جەر - قازاقستان»، - دەدى ول.
«فاريزات، ءوزىڭ دە بىلەتىن شىعارسىڭ، سەنىڭ اتاڭنىڭ ءبىر قىزى مەنىڭ تۋىسىما تۇرمىسقا شىققان. سوندىقتان ءبىزدىڭ تۋىستىق بايلانىسىمىز بار. ساعان ساتتىلىك تىلەيمىن»، - دەدى ەلباسى ءوز كەزەگىندە.
اۆتور: مارلان جيەمباي
