دونور جۇرەگى سالىنعان ءبىرىنشى قازاقستاندىق ن. نازاربايەۆقا مەديتسينا سالاسىندا جۇرگىزگەن رەفورماسى ءۇشىن العىس ءبىلدىردى
ەستەرىڭىزگە سالا كەتەيىك، 2012-جىلدىڭ 8- تامىزىندا قازاقستاندا العاش رەت جۇرەك الماستىرۋ وپەراتسياسى جاسالدى. تانىمال كارديوحيرۋرگ يۋري پيا باستاعان ەلورداداعى ۇلتتىق كارديولوگيا عىلىمي ورتالىعىنىڭ قىزمەتكەرلەرى 38 جاستاعى ناۋقاسقا 46 جاسار ايەل دونوردىڭ جۇرەگىن سالدى. دونوردىڭ ۇلى يگور ۆوروتنيكوۆ اناسىنىڭ جۇرەگى جانە بۇيرەگىن الۋعا رۇقسات بەرگەننەن كەيىن دارىگەرلەر جۇرەكتى جانىبەك وسپانوۆقا، ال، بۇيرەكتى تاعى ءبىر ناۋقاسقا سالعان ەدى.
«مەن 100 پايىز اسسامبلەيا ادامىمىن. قازاق بولىپ دۇنيە كەلدىم، وتانى كورەي جاسادى، ال ورىس ايەلىنىڭ جۇرەگى ماعان ەكىنشى ءومىر سىيلادى. مۇنداي شەشىمدى ونىڭ بالالارى يگور مەن ۆەرونيكا قابىلدادى. ەندىگى ۋاقىتتا ولار مەنىڭ جاقىندارىم ءارى تۋىستارىم»، - دەدى ول.
ج. وسپانوۆ مەديتسينا سالاسىنداعى رەفورمالاردىڭ ارقاسىندا مۇنداي كۇردەلى وپەراتسيالارعا قولجەتىمدىلىك ارتا تۇسكەندىگىن باسا ايتتى. سونىمەن بىرگە پرەزيدەنتتىك «ماڭگىلىك ەل» يدەياسى وزگەنىڭ باسىنا تۇسكەن اۋىرتپالىققا بەي-جاي قارامايتىن جاڭا بۋىننىڭ وسۋىنە سەپتىگىن تيگىزۋىنە سەنىمدى ەكەندىگىن جەتكىزدى.
«سوڭعى 4 جىلدا قازاقستاندا مۇنداي 847 وتا جاسالسا، ونىڭ 33 ءى جۇرەك الماستىرۋ. بۇگىندە مەن سياقتى ادامدار «ءومىر تىنىسى» دەپ اتالاتىن قوعامدىق ۇيىمعا توپتاستىق. ءبىز تولىققاندى ادامبىز، وقيمىز، جۇمىس ىستەيمىز، بالا تاربيەلەيمىز، سپورتپەن ايلانىسامىز. ءتىپتى دۇنيەجۇزىلىك سپورتتىق ترانسپلانت ويىندارعا دا قاتىسقىمىز كەلەدى. بۇل ءبىز سياقتى ادامدارعا ارنالعان وليمپيادالىق ويىندار. ءبىزدىڭ ارمانىمىز - «ماڭگىلىك ەل» پاتريوتتىق اكتىسىنىڭ قابىلدانۋ قۇرمەتىنە وراي قازاقستاننىڭ كوك بايراعىن وسى ويىنداردا جەلبىرەتۋ»، - دەدى ج. وسپانوۆ.
«ارينە، يۋري پيا ءبىزدىڭ جەتەكشى كارديوحيرۋرگىمىز جانە كارديوورتالىعىمىز بۇل الەمدە تانىمالدىققا يە بولا تۇسۋدە. بىزگە مۇنداي وتا جاساتۋ ءۇشىن كەلىپ جاتادى. بۇل كەرەمەت ەمەس پە... مىنە، الدىمىزدا دونور جۇرەگى سالىنعان ادام تۇر. دۇرىس ايتادى، ول ەكىنشى رەت دۇنيەگە كەلدى»، - دەدى ءوز كەزەگىندە ق ر پرەزيدەنتى.
اۆتور: مارلان جيەمباي
