مينيستر ءبىلىم سالاسىنداعى باستامالاردى وقىتۋشىلارمەن تالقىلاۋى ءتيىس - ن. نازاربايەۆ

استانا. قازاقپارات - ءبىلىم سالاسىنداعى باستامالار جان- جاقتى تالقالۋدان كەيىن عانا مەكتەپ باعدارلاماسىنا ەنگىزىلۋى ءتيىس.

 بۇگىن «تاۋەلسىزدىك. كەلىسىم. بولاشاعى ءبىرتۇتاس ۇلت» كۇن تارتىبىمەن ءوتىپ جاتقان قازاقستان حالقى اسسامبلەياسىنىڭ XXIV سەسسياسىندا ەلباسى نۇرسۇلتان نازاربايەۆ وسىلاي دەدى.

«حالىققا اشىق ۇكىمەتتى ءتۇسىندىرۋ جۇمىستارى اقساپ جاتىر. ءبىز وندىرەتىن، جاسايتىن ىستەردى حالىققا ءتۇسىندىرۋ قاجەت. بارلىعى بىردەي كەشكە قاراي تەلەديدار الدىندا وتىرمايدى، ولارعا جۇمىس ىستەۋ كەرەك. بارلىعى بىردەي گازەت تە وقىمايدى. بىزدە «نۇر وتان» پارتياسى، اسسامبلەيا، جەرگىلىكتى اتقارۋشى ورگاندار بار. ولار اۋىلداردا، اۋدانداردا مۇنىڭ نە ءۇشىن قابىلدانعانىن ءتۇسىندىرۋى كەرەك»، - دەدى ەلباسى.

 وسى رەتتە ق ر پرەزيدەنتى بەس كۇندىك وقۋ، ءۇش تىلدە ءبىلىم بەرۋدى قوسا العاندا مەكتەپتەگى ءبىلىم سالاسىنا قاتىستى باستامالاردىڭ كەڭىنەن تالقىلانىپ جاتقانىن ايتتى.

 «ءبىلىم مينيسترلىگى ەڭ الدىمەن بۇل ماسەلەلەردى وقىتۋشىلارمەن تالقىلاۋى ءتيىس. ماسەلەن، مەن بالالارىمىزعا جۇكتەمە تىم ارتىق دەپ سانايمىن. 5 كۇندىك ءبىلىم بەرۋدى قىسقارتۋ ەسەبىنەن جاساۋ قاجەت. ماسەلەن، قازاق ءتىلى مەن ادەبيەتىن ءبىر ءپان جاساۋعا، ورىس ءتىلى گراماتيكاسى مەن ادەبيەتىن، تاريح پەن گەوگرافيانى قوسۋعا بولاتىن شىعار»، - دەدى مەملەكەت باسشىسى.

سونىمەن قاتار، ەلباسى ءبىلىم سالاسىنداعى بۇل وزگەرىستەر بالالارىمىزدىڭ، ەلىمىزدىڭ بولاشاعى ءۇشىن اسا قاجەت ەكەندىگىن اتاپ ءوتتى.

«بۇعان قوسا، بارلىعى دا تىڭعىلىقتى تالقىلاۋدان كەيىن قابىلدانۋى ءتيىس. مەكتەپ ماسەلەسىنىڭ ءاربىر وتباسىنا قاتىستى بار. سوندىقتان، بارلىق پوزيتسيا ايتىلۋى ءتيىس. ويلاستىرىلماعان ەكسپەريمەنتكە جول جوق. ءبىزدى ەشكىم دە اسىقتىرىپ وتىرعان جوق. ءبىز نە قاجەت ەكەندىگىن ءوزىمىز شەشەمىز»، - دەدى ەلباسى.

 اۆتور: مارلان جيەمباي