ەلوردادا قازاقستان حالقى دوستىعىنىڭ فەستيۆالى وتەدى
شارا بارىسىندا ەتنومادەني بىرلەستىكتەر ءتۇرلى جانرداعى كوركەمدىك نومەرلەردى كوپشىلىك نازارىنا ۇسىندى. بۇل تۋرالى ەلوردا اكىمدىگىنىڭ رەسمي سايتىندا حابارلادى.
«رەسپۋبليكامىزدىڭ تاۋەلسىزدىگىنىڭ 25 جىلدىعىن مەرەكەلەي وتىرىپ، نەگىزى قالانعانىنا 25 جىلدان اسىپ كەتكەن كەيبىر ەتنومادەني بىرلەستىكتەردى ەرەكشە اتاپ وتپەكپىز. بۇل قازاقستان تاۋەلسىزدىگىن العانعا دەيىن ەلىمىزدە ۇلتارالىق كەلىسىمگە جانە ەتنومادەني قوزعالىستى دامىتۋعا كوپ كوڭىل بولىنگەندىگىنىڭ بەلگىسى»، - دەيدى استانا قالاسى قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا.
فەستيۆال شىمىلدىعىن «راديما» بەلارۋس ورتالىعى اشتى. ولار كوپشىلىك نازارىنا ۆوكالدىق جانە ءبي نومەرلەرىن ۇسىنىپ، ولەڭدەر وقىدى، جاس جىگىتتى اسكەرگە شىعارىپ سالۋ سالتىن كورسەتتى. سودان كەيىن قازاقستان رەسپۋبليكاسىنىڭ «باربانگ» كۇردتەر قاۋىمداستىعى» بىرلەستىگىنىڭ وكىلدەرى ونەر كورسەتتى. ولار ۇيلەنۋ تويىندا وتكىزىلەتىن سالت- داستۇرلەرمەن تانىستىردى.
ەكى كۇننىڭ ىشىندە «جاستار» تەاترىنىڭ ساحناسىندا 22 ەتنومادەني بىرلەستىك ءوز ونەرىن ورتاعا سالادى. ءار قويىلىم جارتى ساعاتقا سوزىلادى جانە ءتۇرلى جانرلاردان كوركەمدىك نومەرلەر كورسەتىلەدى: حور جانە ۆوكالدى توپتار، جەكە ورىنداۋ، حورەوگرافيا، ءداستۇرلى مۋزىكالىق- حورەوگرافيالىق كومپوزيتسيا، سونداي-اق، بەينەلەۋ ونەرى، گرافيكا مەن قولونەر تۋىندىلارىنىڭ كورمەسى.
«فەستيۆالدىڭ نەگىزگى ماقساتى - انا تىلىندەگى ەركىن شىعارماشىلىققا جاعداي جاساۋ، ءتول مادەنيەتكە، سالت- ءداستۇر مەن ادەت عۇرىپقا دەگەن سۇيىسپەنشىلىككە باۋلۋ، وعان قۇرمەت كورسەتۋ، مادەني جەتىستىكتەردى ساقتاپ، كوبەيتۋ»، - دەدى ل. قۇسايىنوۆا.
ەرتەڭ ساعات 14.00 ەتنومادەني بىرلەستىكتەردىڭ قاتىسۋىمەن وتەتىن شارا جالعاسىن تابادى. قازاقستان حالقى دوستىعى فەستيۆالىنىڭ گالا- كونسەرتى ساعات 18:00 «جاستار» تەاترىندا وتەدى.
