مەكتەپ وقۋشىلارىنىڭ باسىم بولىگى ۇلتتىق مۋزىكا مۇرالارىنان ماقۇرىم قالىپ جاتىر - ا. مۇساقوجايەۆا

استانا. قازاقپارات - مەكتەپ وقۋشىلارىنىڭ باسىم بولىگى ۇلتتىق مۋزىكا مۇرالارىنان ماقۇرىم قالىپ جاتىر.

بۇل تۋرالى بۇگىن پارلامەنت سەناتىنداعى كەزدەسۋ بارىسىندا قازاق ۇلتتىق ونەر ۋنيۆەرسيتەتىنىڭ رەكتورى ايمان مۇساقوجايەۆا ءمالىم ەتتى.

«ۇلتتىق بىرەگەيلىك وسكەلەڭ كەزدەن باستاپ قالىپتاسادى. سوندىقتان دا، مەملەكەت حالىقتىڭ بوس ۋاقىتىن ءتيىمدى، ونەرگە قولجەتىمدى شارالارمەن قامتاماسىز ەتۋ ءۇشىن دوتاتسيالىق قادامدارعا بارۋى كەرەك. شىعارماشىلىق ۇيلەرى، مۋزىكا ۇيىرمەلەرى اشىلسا، ول حالىققا قولجەتىمىدى بولسا يگى ەدى. قازاقستاندا 357 بالالار ونەر مەكتەبى بار، وعان مۋزىكالىق مەكتەپتەر، بالالار ونەر مەكتەپتەرى دە كىرەدى. ال وسى مەكتەپتەر قامتيتىن بالالار سانى 100 مىڭنان اسادى. سوندا قالعان بالالاردىڭ بارلىعىندا دەرلىك ونەرگە جاقىن بولۋعا ەشقانداي مۇمكىندىك بولماي وتىر، ولار ونەردى قابىلداي المايتىن جاعدايدا»، - دەدى ا. مۇساقوجايەۆا.

ونىڭ ايتۋىنشا، جالپى ءبىلىم بەرەتىن مەكتەپتەردە وقيتىنداردىڭ باسىم بولىگى ۇلتتىڭ اسا باي مۋزىكالىق جانە باسقا دا ونەر مۇرالارى جايلى بىلە بەرمەيدى. قازاقستان مادەنيەتىنىڭ تاريحىن دا جەتكىلىكتى بىلمەيدى. «سوندىقتان دا، مەكتەپتەردە فاكۋلتاتيۆتىك قوسىمشالاردى اشۋ كەرەك. بالالار ءوز ۇلتىنىڭ باي مۇرالارىنان ءنار الىپ وسۋلەرى كەرەك»، - دەدى ا. مۇساقوجايەۆا.

اۆتور: قانات مامەتقازى ۇلى