اقتوبەدە الاياقتىقتىڭ جاڭا ءبىر ءتۇرى شىقتى
اقتوبە قالاسىنىڭ تۇرعىنى ايبەك دۇيسەنوۆ الاياقتارعا الدانعانىن ايتىپ «NUR. KZ» پورتالىنان كومەك سۇرادى. ارىزدانۋشىنىڭ ايتۋىنشا، جەرگىلىكتى پوليتسيا قىزمەتكەرلەرىنەن قايران جوق.
«ءوزىم مال بازارىندا مال ساتۋمەن اينالىسامىن. 9 -ءساۋىر كۇنى بازارعا ءبىر جىگىت كەلىپ «قوي الاسىڭ با؟» دەپ سۇرادى. باعاسىنا كەلىسسەم الاتىنىمدى ايتتىم. ولار مەنى قالا سىرتىنا «پريگورودنىي 1» - دە اعامنىڭ ءۇيى بار» دەپ ءبىر جەرگە ەرتىپ اپاردى. سول جاقتان مەنى ءۇش جىگىت كۇتىپ الدى. ەكەۋى قازاق، بىرەۋى ورىس. مەدەت پەن ارمان دەگەن ەكى قازاق جىگىت مەنى قوراعا اكەلدى. سول جەردە ءبىر كىسى ماشينا جۋىپ تۇردى. ۇيدەن ءبىر ايەل شىعىپ ەدى ونىڭ قاسىنا مەدەت دەگەنى بارىپ سويلەستى. ودان شاي ما، سۋ ما بىردەڭە سۇراپ، كەيىن الىپ كەتتى. شامالىدان كەيىن قايتىپ كەلىپ، باعاسىمەن كەلىستى. قورادا وتىز باس قوي قوزىسىمەن ءجۇردى. ولار سونى 700 مىڭ تەڭگەگە بەرەتىنىن ايتتى»، - دەيدى ايبەك دۇيسەنوۆ.
مالداردى كورسەتكەننەن كەيىن ونى قورانىڭ قاسىنان الىپ كەتكەن. ايبەك دۇيسەنوۆ ۇيدە جۇرگەن ادامداردىڭ ەشقايسىسىمەن سويلەسپەگەن. ول ءوزىن ەرتىپ كەلگەن ءۇش جىگىتكە ەرىپ جۇرە بەرگەنىن ايتادى.
«ولار «مىنا جەردەن مالدىڭ ءيىسى شىعىپ تۇر، ءۇيدىڭ الدىنا بارىپ سويلەسەيىك» دەدى. مەن ولارعا وتىز باس قويدىڭ ءبارىن الا المايتىنىمدى، 15 باسىن 300 مىڭ تەڭگەگە الاتىنىمدى ايتتىم. ولار ماشيناعا ەرتىپ اپارىپ سويلەستى. تەلەفونمەن بىرەۋگە حابارلاسىپ «15 باستى الام دەپ تۇر، بەرەيىن بە؟» دەپ سۇرادى. مەن ۇيىندە جۇرگەن ادامدار ولاردىڭ شىنىمەن اعا- جەڭگەسى ەكەن دەپ ويلادىم. «مالدى اعا-جەڭگەم باعىپ وتىر، مال بىزدىكى. باعاسىن پاپام شەشەدى» دەپ سەندىرىپ ايتتى. وزدەرى «قازىر مالدى تيەسەمىز، اقشانى تولەپ تاستا، ءبىر جەرگە تىعىز كەرەك بولىپ تۇر» دەگەن سوڭ مەن سول جەردە 15 باس قوزىلى قويدىڭ اقىسى دەپ 300 مىڭ تەڭگەنى ساناپ بەردىم. ماعان «ارتقى جاقتى اينالىپ كەل، قاقپا سول جاقتا سوسىن سول جاقتان تيەپ جىبەرەيىك» دەدى. اقشانى ساناپ بەرگەن سوڭ، قورانىڭ ارتىنداعى قاقپاعا باردىم. ۇيىندە جۇرگەن كىسى ەسىكتى اشىپ كىرگىزدى. مەن ول كىسىگە مالدى تيەيىك دەسەم، «ءبىرىنشى اقشاڭدى تولەمەيىسىڭ بە، ءبىز 15 باستى ءبولىپ ساتپايمىز، ساتساق ءبارىن ساتامىز» دەپ قاراپ تۇر. تۇسىنبەي قالدىم. مەن جاڭاعى بالاعا بەرگەنىمدى ايتىپ، ول ءىنىڭ ەمەس پە ەدى دەپ جانتالاسىپ سۇراپ جاتىرمىن. ول «قوي، ولار دا مال الام دەپ كەلگەن ادامدار. قازىر اعامدى الىپ كەلەپ دەپ كەتكەن» دەيدى. سودان ەسىك الدىنا جۇگىرىپ شىقتىم. ماشينا كەتىپ قالعان. بىردەن پوليتسياعا زارەچنىي بولىمشەسىنە بارىپ ارىز جازدىم»، - دەيدى ايبەك.
الدانعانىن كەش تۇسىنگەن ول جانتالاسىپ ىزدەۋ سالعانىمەن ەشكىمدى قولىنا تۇسىرە المايدى.
«ءوزىم ۇيگە كەلىپ، عالامتور ارقىلى ىزدەۋ جۇرگىزدىم. الداپ كەتكەن جىگىتتەردىڭ مەدەت نازارقۇلوۆ پەن ارمان قۇنۇسبايەۆ ەكەنىن تاپتىم. پوليتسياعا اتتارى مەن سۋرەتتەرىن اپارىپ بەردىم. ولار بۇرىننان الاياق جىگىت ەكەندەرىن ايتتى. بىرەۋىنىڭ اكەسى اقتوبەدەگى «سەنىم» كلينيكاسىندا دارىگەر بولىپ جاسايدى ەكەن. ونىڭ ءۇيىن دە تاپتىم. ۇيىندەگىلەر ول تۋرالى بىلمەيدى ەكەن»، - دەيدى وزدىگىنەن تەرگەۋ جۇرگىزىپ تابانى تاۋسىلعان زارداپ شەگۋشى.
دەرەككوز: Nur.kz
