قازاقستاندا دۇنيەجۇزىلىك بانكتىڭ كەڭسەلەرى اشىلادى

استانا. قازاقپارات - دۇيسەنبى كۇنى پارلامەنت سەناتى قارجى جانە بيۋدجەت كوميتەتىنىڭ كەڭەيتىلگەن وتىرىسى ءوتىپ، وندا «قازاقستان رەسپۋبليكاسىنىڭ ۇكىمەتى مەن حالىقارالىق قايتا قۇرۋ جانە دامۋ بانكى اراسىنداعى قازاقستان رەسپۋبليكاسىندا وفيستەر قۇرۋ جانە ولاردىڭ جۇمىس ىستەۋى تۋرالى كەلىسىمدى راتيفيكاتسيالاۋ تۋرالى» زاڭ جوباسى تالقىلاندى.

كەلىسىمگە 2016 -جىلعى 21 -قاڭتاردا داۆوستا قول قويىلعان.

قۇجاتقا سايكەس، دۇنيەجۇزىلىك بانك قازاقستاندا وفيستەرگە يە بولىپ، ولاردى وپەراتسيالىق جانە اكىمشىلىك قولداۋ قىزمەتتەرىن كورسەتۋ ءۇشىن قىزمەتكەرلەرمەن جاساقتايتىن بولادى. دۇنيەجۇزىلىك بانك قىزمەتكەرلەر مەن قىزمەتشىلەرگە جالاقى مەن باسقا دا شىعىستاردى تولىق كولەمدە وزىنە الادى. بانكتىڭ وفيستەرى مەن ءۇي- جايلارىنا قول سۇعىلمايدى جانە ول دۇنيەجۇزىلىك بانكتىڭ قاراۋى مەن باسقارۋىندا بولادى.

بۇدان بولەك، زاڭ جوباسى اياسىندا بانكتىڭ جانە ونىڭ قىزمەتكەرلەرىنىڭ يممۋنيتەتتەرى ايقىندالىپ وتىر. مۇنداي يممۋنيتەت سوت تورەلىگىنىڭ قالىپتى ىسكە اسىرىلۋىنا كەدەرگى جاسايتىن بولسا، ول ءوزىنىڭ يممۋنيتەتتەرىن كەرى قايتارىپ الاتىن بولادى.

 تۇتاستاي العاندا، كەلىسىم 1994 -جىلعى 23 -مامىرداعى الماتى قالاسىندا تۇراقتى وكىلدىك قۇرۋ تۋرالى شارتتى الماستىرادى. 2001 -جىلدان باستاپ، دۇنيەجۇزىلىك بانكتىڭ وكىلدىگى استانادا جۇمىس ىستەيتىنى، ال، الماتى كەڭسەسى وسى قارجى ينستيتۋتىنىڭ ورتالىق ازياداعى ايماقتىق وكىلدىگى مارتەبەسىن العانى بەلگىلى.

زاڭ جوباسى الداعى ۋاقىتتا وتەتىن پالاتانىڭ جالپى وتىرىسىنا شىعارىلاتىن بولادى.