قازاقستان بالالارىن برازيليا فۋتبول اكادەمياسىنا جىبەرۋ مۇلدەم ءتيىمسىز بولىپ شىقتى - ا. مۇحامەدي ۇلى
بۇگىن ماجىلىستە ءوتىپ جاتقان بۇقارالىق سپورتتى جانە دەنە شىنىقتىرۋدى دامىتۋ تاقىرىبىنداعى ۇكىمەت ساعاتىندا دەپۋتاتتار ساۋالىنا جاۋاپ بەرگەن مادەنيەت جانە سپورت ءمينيسترى ارىستانبەك مۇحامەدي ۇلى وسىلاي ءمالىم ەتتى.
جيىن بارىسىندا دەپۋتات نۇرتاي ءسابيليانوۆ 2009-جىلدان باستاپ قازاقستان برازيليا فۋتبول اكادەمياسىنا جاسوسپىرىمدەردى جىبەرىپ كەلە جاتقانىن اتاپ ءوتتى. «بۇعان جىلىنا 100 ميلليون تەڭگە كەتەدى. بيىل 200 ميلليون تولەيمىز، 25 بالا 3 جىل بويى وقىپ كەلەدى. وسى ۋاقىتقا دەيىن ەلۋ بالا برازيليا اكادەمياسىن ءبىتىرىپتى.
الايدا، ولاردىڭ ەشقانداي دا جەتىستىگىن كورە الماي وتىرمىز. برازيليادان كەلگەندەردى «بايتەرەك» كلۋبىنا الىپ كەلدىك، ول كلۋب جەڭىلىستەن كوز اشقان جوق. قازاقستان جاستار قۇراماسىندا دا بار. الايدا، سانكت پەتەربوردان ولار ەڭ سوڭعى ورىن الىپ كەلدى. بۇل قالاي؟» - دەدى دەپۋتات ن. سابيليانوۆ.
ءوز كەزەگىندە مينيستر ارىستانبەك مۇحامەدي ۇلى برازيليا فۋتبول اكادەمياسىنىڭ شىنىمەن دە قازاقستان جاسوسپىرىمدەرى ءۇشىن ءتيىمسىز ەكەنىن ايتىپ، دەپۋتاتتاردىڭ سىنىمەن كەلىسەتىنىن ءبىلدىردى.
«بۇل ۇلكەن سۇراق. ءبىراز قاراجات شىعىندالعانىمەن، شىنىندا دا ناقتى ناتيجە جوق. شىندىعىن ايتۋىمىز كەرەك، قازىر وسى ماسەلەنى قايتا قاراپ جاتىرمىز. ويتكەنى، برازيليادا فۋتبولدىڭ الەمدىك جۇلدىزدارى شىققانىمەن، تاجىريبە جۇزىندە ولاردا وقىتۋ جۇيەسى مۇلدەم باسقا ەكەن. جاتتىقتىرۋشىلار دوپتى لاقتىرا سالادى، بالالار ويناسا دا ويناماسا دا ءوز ەركى. بايقاساق، ول جەردەگى الەمدىك جۇلدىزدار جاستايىنان مەكتەپكە بارماعاندىقتان، تاۋلىك بويى فۋتبول ويناپ، سونىمەن كۇن كورگەن ەكەن. سوندىقتان دا، بىزگە بۇل ءۇردىس كەلمەيدى ەكەن»، - دەدى مينيستر.
ونىڭ ايتۋىنشا، وسىعان بايلانىستى برازيلياعا جاسوسپىرىمدەردى جىبەرۋ توقتاتىلۋى مۇمكىن. ويتكەنى، ونداعى جاتتىعۋدان ناتيجە شامالى بولىپ وتىر.
«تالداۋ جاسالىپ جاتىر. ماسەلەن، فۋتبولداعى جاسوسپىرىمدەر ءۇشىن ەڭ ءتيىمدى مەكتەپتەر گەرمانيا مەن نيدەرلاندىدا ەكەن. ءبىز قازىر وسى باعىتتا جۇيەلى تۇردە فۋتبولمەن اينالىساتىندار ءۇشىن كەلىسسوزدەر جۇرگىزىپ جاتىرمىز»، دەدى ا. مۇحامەدي ۇلى.
اۆتور: قانات مامەتقازى ۇلى
